Վարորդական տեսական քննության հարցաշարում շատ են անիմաստ հարցերը, գործնական քննության մեջ մեծ է կոռուպցիոն ռիսկը

2008թ կառավարության հաստատած կարգի համաձայն՝ վարորդական վկայական ստանալու համար հարկ է հանձնել տեսական և գործնական քննություններ. տեսականն ընդունում է համակարգիչը, գործնականը՝ տեսուչը։ Սակայն շատերը դժգոհ են տեսական հարցաշարում «անիմաստ և վարորդական քննության համար տարօրինակ» հարցերից, շատերը՝ տեսուչների սուբյեկտիվ վերաբերմունքից, տեսուչները՝ անգրագետ «տեսաբաններից»։ Խնդրին անդրադարձել է «Արմենիա» հեռուստատեսության «Կիրակնօրյա ժամը» լրատվականը։

Հարցաշարում առկա են հարցեր, օրինակ, այնպիսի լուսակիրների մասին, որպիսիք Հայաստանում չկան։ Այստեղ առկա բազմաթիվ բժշկական հարցերին անդրադառնալով՝ «Աքիլլես» ՀԿ-ի նախագահ Էդուարդ Հովհաննսյանը ևս նշել է, որ, իհարկե, հնարավոր է «հարցերը զուբրիտ անել», բայց գործնական պարապմունքներ չանցնելու պատճառով այդ հարցերն ու իրենց պատասխանները մոռացվելու են անմիջապես քննություն հանձնելուց հետո։ «Բացի դա, եթե մարդը տեսնի էդ ամեն ինչը [որովայնախոռոչը] բաց ու աղիքները թափած, կարող ա, չի կարող ինքը մոտենա, կարող ա մոտենա, իրա ուշքը գնա»,- նշել է նա։

Ավտոդպրոց հաճախելն այլևս պարտադիր չէ, բավական է գործնական քննության ժամանակ ապացուցել հմտությունը, սակայն գնահատականը նշանակվում է բացառապես տեսուչի դիտարկումներով։ Ըստ Էդուարդ Հովհաննիսյանի՝ այստեղ բավական մեծ է կոռուպցիոն ռիսկը։ 

40-ամյա ավտոուսուցման փորձ ունեցող Արտավազդ Ասատրյանը վստահ է, որ գործնական գիտելիքների պակաս կա, իսկ տեսականն այնքան վատ է կազմված, որ «մինչև հասնում ես հարցի վերջը, սկիզբը մոռանում ես»։ Ըստ նոր կարգի՝ քննությունը կարելի է հանձնել անձնական մեքենա կամ ցանկացած մեքենա վարելով՝ Ասատրյանի կարծիքով՝ նախընտրած մեքենան որոշ տարածությունը վարողն, այնուամենայնիվ, չի կարող համարվել «B» կամ «C» կարգի վարորդ։