RIM-ը ստիպված է փոփոխել նոր բջջային հարթակի անվանումը

Research In Motion (RIM) ընկերությունը վերջապես ուշադրություն դարձրեց Basis International ընկերության բողոքներին, որը մեղադրում էր BlackBerry սմարթֆոնների կանադական արտադրողին իր նոր համակարգերում BBX անվանումն ապօրինաբար օգտագործելու համար:

Հիշեցնենք, որ հոկտեմբերին RIM-ը ներկայացրեց բջջային հեռախոսների նոր ծրագրային հարթակ՝ BlackBerry BBX անվանմամբ, որը, ըստ մշակողների խոսքերի, իր մեջ կներառի QNX և BlackBerry OS բջջային հարթակների լավագույն հատկությունները:

RIM-ի հայտարորությանն անմիջապես հաջորդել էր Basis International ընկերության բողոքը BBX ապրանքանիշի անօրինական օգտագործման դեմ և դրա օգտագործումը դադարեցնելու պահանջը: Սակայն RIM ընկերություն այդպես էլ ուշադրություն չէր դարձրել այդ բողոքներին:

Գործը հանձնվել էր դատարան, և, ինչպես հայտնի դարձավ դեկտեմբերի 8-ին, նոր հարթակը կկրի ոչ թե BlackBerry BBX, այլ BlackBerry 10 անվանումը:

Սպասվում է, որ BlackBerry 10 հիմքի վրա առաջին սմարթֆոնները կներկայացվեն 2012 թվականին:

PCnews.am