Anonymous-ը մարտի 31-ին կանջատի ինտերնետը

Anonymous հաքերային շարժումը հայտարարել է մարտի 31-ին «ինտերնետն անջատելու» մտադրության մասին` #opGlobalBlackout օպերացիա անցկացնելու նպատակով: Ինչպես հաղորդում է Securitylab.ru-ն, օպերացիայի ընթացքում հաքերները պատրաստվում են խախտել 13 կարևորագույն DNS- սերվերների աշխատանքը:

«Որպես SOPA-ի, Ուոլ Սթրիթի, մեր անպատասխանատու առաջնորդների ու սիրելի բանկիրների դեմ պայքարի նշան, որոնք ստիպում են աշխարհին սովամահ լինել իրենց եսասիրության պատճառով, և հանուն սադիստական հասարակ զվարճանքի, մարտի 31-ին Anonymous-ը կանջատի ինտերնետը»,- ասված է անանուն «վրեժխնդիրների» հաղորդագրության մեջ:

Կիբերհանցագործների խոսքով` DNS-սերվերների` ինտերնետից անջատման արդյունքում ոչ ոք չի կարող կատարել դոմենային անվան որոնում, և այդպես` կանջատվի HTTP-ն` Web առավել հաճախ օգտագործվող ֆունկցիան:

«Ամեն անգամ http://www.google.com գրելիս կամ ցանկացած այլ URL, օգտատերը կհայտնվի սխալ էջի վրա և կհամարի, որ ինտերնետն անջատված է, իսկ դա բավական է: Հիշեք, որ սա բողոք է, և մենք մեր առջև ինտերնետը «սպանելու» նպատակ չենք դնում, ուղղակի ժամանակավորապես անջատում ենք այն, ինչն ամենից շատ է հարկավոր», - ասել են նրանք: