«Վերջին դասի» կապակցությամբ Երևանում միջոցառումներ են նախատեսված

Մայիսի 25-ին «Վերջին դասի» առիթով Երևանում մի շարք միջոցառումներ են նախատեսված, այս մասին այսօր Tert.am-ին տեղեկացրեց Երևանի քաղաքապետարանի հասարակայնության հետ կապերի և տեղեկատվության վարչության պետ Արթուր Գևորգյանը:

«Իհարկե, որոշակի միջոցառումներ նախատեսված են, բայց չենք կարող ասել, թե որտեղ: Դրանց մասին առաջիկայում լրացուցիչ կտեղեկացվի»,- ասաց Արթուր Գևորգյանը:

ՀՀ կրթության և գիտության նախարարության հանրակրթության վարչության պետ Նարինե Հովհաննիսյանն էլ նշեց, որ շրջանավարտները ազատ են իրենց միջոցառման անցկացման ձևաչափում:

«Իրենք են որոշում՝ որտեղ անցկացնել իրենց վերջին դասը՝ դասարանում, թե դահլիճում, քանի որ դա իրենց միջոցառումն է»,- ասաց նա:

Թե «Վերջին դասի» օրը Կրթության և գիտության նախարար Արմեն Աշոտյանը ո՞ր դպրոցներում է լինելու, ԿԳՆ հասարակայնության հետ կապերի և տեղեկատվության վարչության պետ Արթուր Բաղդասարյանը Tert.am-ին ասաց, որ դեռևս որոշված չէ:

Երևանի քաղաքապետարանի տեղեկատվության և հասարակայնության հետ կապերի վարչությունն առանձին հայտարարություն է տարածել, որով տեղեկացնում է, որ քաղաքապետ Տարոն Մարգարյանը պատասխանատու բոլոր կառույցներին հանձնարարել է խիստ ուշադրություն դարձնել նախատեսվող միջոցառումների ժամանակ շրջանավարտների անվտանգության ապահովմանը:

Բացի այդ, քաղաքապետը հրահանգել է դպրոցներում ամեն կերպ կանխարգելել դրամահավաքության դեպքերը: