Ադրբեջանցի, ռուսալեզու հաքերները կոտրել են հայերի էլփոստերը. Սամվել Մատրիոսյան

Ադրբեջանցիներն ու ռուսները կամ ռուսալեզու հաքերները զանգվածային նոր հարձակումներ են կատարել հայկական էլեկտրոնային փոստերի վրա, այս մասին Տեղեկատվական տեխնոլոգիաների փորձագետ, բլոգեր Սամվել Մարտիրոսյանը գրառում է կատարել իր բլոգում:


Բլոգում Մարտիրոսյանը տեղադրել է այն էլփոստերի ցանկերը, որոնք հարձակման են ենթարկվել:


«Գաղտնաբառերը ես ջնջել եմ, բայց դրանք բաց դրված են ցանցում: Ցանկացած մարդ կկարողանա մտնել այդ էլփոստսերի մեջ, այնպես որ մարդիկ պետք է ցանկը նայեն, գտնեն և շուտ փոխեն գաղտնաբառերը»,- Tert.am-ի հետ զրույցում ասաց բլոգերը:

Հարցին` ինչի՞ց է ենթադրվում, որ հարձակումը կատարվել է ադրբեջանցի կամ ռուս հաքերների կողմից, Մարտիրոսյանը պատասխանեց.«Էլփոստերի մի շարքը դրված է ռուսալեզու հաքերային ֆորումի վրա, մի շարքն էլ ադրբեջանական»,- պարզաբանեց նա:


Փորձագետն իր բլոգում նշում է էլփոստերը կոտրելու պատճառները: Մարտիրոսյանն իբրև առաջին պատճառ համարում է հեշտ գաղտնաբառերի օգտագործումը, օրինակ` mama, koko, 1234 և այլն, ապա վիրուսները:


Մյուս պատճառը, ըստ նրա, կարող է համարվել նույն գաղտնաբառի օգտագործումը, ինչը հաքերները կոտրել են, հետո փորձել դրանով մտնել էլ. փոստ:


Բլոգերը նաև տեղեկացնում է, թե շատ հավանական է, որ կոտրվել է araratyan-tem.am կայքը, և այնտեղից տարվել է գաղտնաբառերի մի մասը։