Հանգստյան օրերին արված վիրահատությունից հետո մահանալու վտանգն ավելի մեծ է, քան աշխատանքային օրերին. բրիտանացի գիտնականներ

Վերլուծելով վիրահատությունից հետո հիվանդների մահացության դեպքերը՝ բրիտանացի գիտնականները եկել են այն եզրակացության, որ այն հիվանդները, ում վիրահատությունը նշանակված է աշխատանքային շաբաթվա վերջում կամ հանգստյան օրերին, մահանալու ավելի մեծ վտանգի են ենթարկվում, քան նրանք, ում վիրահատում են շաբաթվա սկզբին: Այս մասին գրում է Russia Today-ը:

Գիտնականները ենթադրում են, որ ուրբաթ օրը վիրահատվելուց հետո մահանալու վտանգն ավելանում է 44 տոկոսով, քանի որ հանգստյան օրերին հիվանդներին հիմնականում անհրաժեշտ օգնություն չի ցուցաբերվում:

Լոնդոնի Թագավորական քոլեջի գիտնականներն ուսումնասիրել են 2008-2011-ին իրականացված ավելի քան 4.1 մլն վիրահատություններ, որոնցից շուրջ 27.5 հազարը ավարտվել են մահվան ելքով: Վիրահատությունների 4.5 տոկոսը կատարվել էր հանգստյան օրերին: Երեքշաբթին և երկուշաբթին համարվում են ամենահարմար օրերը վիրահատություն անելու համար: