Բելառուս գիտնականները գտնում են, որ Չեռնոբիլի անտառներից ստացված փայտանյութից կարելի է կահույք պատրաստել

Փայտը, որը ստացվել է Չեռնոբիլի ԱԷԿ-ի մեկուսացված գոտում, կարող է լավ ծառայել կահույք պատրաստելու համար, գտնում են բելառուս գիտնականները, գրում է Russia Today-ի ռուսական ծառայությունը:

Բելառուսի Գիտությունների ազգային ակադեմիայում կարծում են, որ նման փայտում ռադիոակտիվ է միայն վերին շերտը, իսկ ավելի հաճախ միայն կեղևը: Վարակված նյութից հնարավոր է ազատվել բելառուսական հատուկ սարքերի միջոցով:

Մեկուսացված գոտում գտնվող փայտանյութը պետք է մտցնել արտադրության մեջ, որովհետև այդ շրջանում փայտը չորանում է, ինչը կարող է հրդեհների հանգեցնել: Ըստ բելառուս գիտնականների, տարեկան հնարավոր է ստանալ մի քանի միլիոն խորանարդ մետր էկոլոգիապես մաքուր փայտանյութ:

1986թ. Չեռնոբիլի ԱԷԿ-ի վթարից հետո ստեղծվել էր մեկուսացման գոտի՝ պայթյունի վայրի շուրջ 30 կմ տարածքում: Այս շրջանում արգելված է մարդկանց բնակությունը: