Google-ն ԱՄՆ-ից թույլտվություն է խնդրել հատուկ ծառայությունների դիմումները հրապարակելու համար

Ամերիկյան հանրահայտ Google ընկերությունը դիմել է ԱՄՆ-ի դատարան, որպեսզի այն իրեն թույլ տա հրապարակել հատուկ ծառայություններից օգտատերերի անձնական տվյալների վերաբերյալ ստացված դիմումները։

Ինչպես նշում է Daily Mail-ը, հայցը ներկայացվել է Վաշինգտոնում այն բանից հետո, երբ հայտնի է դարձել, որ Միացյալ Նահանգների Ազգային անվտանգության գործակալությունը և մյուս հատուկ ծառայություններն ուղիղ մուտք ունեն մի քանի տեխնոլոգիական հսկաների սերվերներ ու օգտատերերի անձնական տվյալների բազա։

«Այս գործում պարզություն ու թափանցիկություն է հարկավոր, ուստի մենք ցանկանում ենք հրապարակել դիմումների վերաբերյալ վիճակագրությունը»,-նշել է Google-ի խոսնակը։ Նա նաև նշել է, որ ընկերությունը ցանկանում է նման քայլի դիմել, որպեսզի սկանդալից հետո Google-ի հեղինակությունն անկում չապրի։

Հիշեցնենք, որ վերջերս ամերիկյան հեղինակավոր The Washinghton Post պարբերականը սկանդալային նյութ էր հրապարակել, որում նշվում էր, որ Google, Apple, Microsoft և Facebook ընկերություններն օգտատերերի անձնական տվյալների վերաբերյալ տեղեկություններ են տրամադրել հատուկ ծառայություններին։