ԱՄՆ-ի ոստիկանությունը հրապարակել է ոստիկանի կողմից 12-ամյա տղայի սպանության տեսանյութը (նկարներ, տեսանյութ)
ԱՄՆ-ի Օհայո նահանգի Քլիվլենդ քաղաքի ոստիկանությունը հրապարակել է տեսանյութ, որտեղ երևում է, թե ինչպես են պարեկային ոստիկանության աշխատակիցները խաղահրապարակում կրակել և սպանել սևամորթ 12-ամյա Թամիր Ռայսին, գրում է Daily Mail-ը։
Դեպքը տեղի է ունեցել նոյեմբերի 23-ին, երբ 911 ծառայություն ահազանգ է ստացվել, որ քաղաքի «Կադել» հանգստի գոտու խաղահրապարակում մի տղա խաղ է անում ատրճանակով և պարզում այն շրջակայքում գտնվողների ուղղությամբ։
Չնայած նրան, որ զանգահարողը զգուշացրել էր, որ «ամենայն հավանականությամբ տղայի ձեռքին խաղալիք զենք է», դրա մասին 911 ծառայության աշխատակիցը չի հաղորդել պարեկային ոստիկանության սպաներին, գրում է rg.ru-ն։
Հանրային վայրերի անվտանգության տեսախցիկներից մեկի նկարահանած տեսանյութում երևում է, թե ինչպես է ոստիկանության մեքենան արագորեն դեպքի վայր ժամանում և կայանում է ուղիղ խոտածածկ տարածքում, և սպաներից մեկն այնքան արագ է կրակում տղայի ուղղությամբ, որ նրա գործընկերը չի հասցնում մեքենայից դուրս գալ։
Ոստիկանությունը մեկնաբանել է, որ տղան չի ենթարկվել «ձեռքերդ վե՛ր» հրամանին և ձեռքը տարել է գոտկատեղի մոտ, որից հետո ոստիկանը կրակել է Ռայսի վրա։
Նրանք նաև հայտարարել են, որ խաղալիք զենքի վրայից հեռացված է եղել վառ նարնջագույն ցուցիչը, որը փակցնում են իրական թվացող խաղալիքների վրա՝ դրանց խաղալիք լինելը մատնանշելու համար։
Տղայի վրա կրակել է 26-ամյա սպա Թիմոտի Լոխմանը, ով ոստիկանությունում աշխատում էր ընդամենը 6 ամիս։
Տղան որովայնի շրջանում ստացած վնասվածքներով տեղափոխվել էր հիվանդանոց, սակայն հաջորդ օրը մահացել էր։
Քլիվլենդի բնակչությունը գտնելով, որ դժբախտությունը հնարավոր էր կանխել, բողոքի ցույցեր է անցկացրել՝ որպես կարգախոս ընտրելով «Ձեռքերը վե՛ր, մի՛ կրակեք» արտահայտությունը։
Բողոքի ցույցեր են անցկացվում նաև ԱՄՆ-ի այլ քաղաքներում սպիտակամորթ ոստիկանի արդարացման դատական որոշման կապակցությամբ. ոստիկան Դարեն Ուիլսոնը Ֆերգյուսոն քաղաքում մի քանի անգամ կրակել է ձեռքերը վեր պարզած սևամորթ դեռահաս Մայքլ Բրաունի վրա՝ սպանելով նրան, որից հետո դատարանը վերջերս նրան անմեղ է ճանաչել։
























