Երթուղայինների վարորդները մինչև տոների ավարտը ոչ մի գործադուլ չեն անի. Հրանտ Եղիազարյան
Փոխադրողների միության նախագահ Հրանտ Եղիազարյանն այսօր կայացած ասուլիսին հայտարարեց, որ երեկ քաղաքային իշխանություններն իրենց խոստացել են, որ ամեն ինչ կանեն գազի գնի հարցը կարգավորելու համար:
«Մենք էլ պայմանավորվել ենք մեր վարորդների հետ, որպեսզի ոչ մի ակցիա չանեն, շարունակեն աշխատել, մինչև տոներն անցնեն»,-ասաց նա:
Վերջինս նաև տեղեկացրեց, որ քաղաքապետարանի հետ վերջնական պայմանավորվել են, որ հունվարի տասնհինգին իրենց կընդունեն և իրենց խնդիրները կլուծեն:
«Սակագնի վերանայում, իհարկե, չեն անի: Գազի գինը կգա նախկին գնին, մոտենալու է այն թվին, որը կար մինչև դոլարի թանկացումը»,-ասաց նա և վստահեցրեց, որ դեռ ոչ մի լուր չունի, որ այսօրվա դրությամբ որևէ երթուղի հրաժարվել է աշխատել:
Ըստ միության նախագահի՝ գործադուլ անող վարորդներ այս պահի դրությամբ չկան:
Նա նաև հիշեցրեց, որ այսօրվա ավտոմեքենաների շահագործումը կատարվում է դրանց ֆիզիկական մաշվածության հաշվին:
«Մի օր պետք է տրանսպորտի գինը բարձրանա, թե ո՞ւմ հաշվին, պետությունը թող որոշի: Բայց այն, որ հարյուր հիսուն դրամը չի բավարարելու, դա արդեն փաստ է»,-ասաց նա:










