Մայրը խնդրում է «Իսլամական պետությանը» վերադարձնել 3-ամյա որդուն՝ նրան տեսնելով լուսանկարներից մեկում (նկարներ)
Իտալական թոք շոուի ժամանակ Լիդիա Հերերա անունով կինը դիմել է Սիրիայում գործող «Իսլամական պետություն» ծայրահեղական խմբավորմանը՝ խնդրելով վերադարձնել իր 3-ամյա որդուն։
Նա խմբավորմանը նման խնդրանքով դիմել է, երբ AK-47 զենքով նրա որդու՝ Իսմայիլի լուսանկարները հայտնվել են համացանցում՝ «Իսլամական պետության» հետ կապված էջերում, հաղորդում է Daily Mail-ը:
Տղայի հայրը՝ Իսմար Մեսինովիչը, սեպտեմբերին սպանվել է Հալեպում, սակայն Հերերան տեղեկություններ չի ունեցել իր որդու մասին մեկ տարի շարունակ՝ մինչ լուսանկարների հայտնվելը:
Խոսելով հաղորդման ընթացքում՝ նա ասել է, որ երբեք չի դադարել իր որդու մասին մտածել։
«Ես աղաչում եմ այս մարդկանց թույլ տալ ինձ խոսել նրա հետ, նրա լուսանկարը տեսնել: Առանց նրա ես չգիտեմ՝ ինչ եմ անելու»,- ասել է նա:
Կինը հույս է հայտնել, որ իսլամիստները կմտածեն մոր մասին, ով հուսահատորեն փնտրում է իր երեխային և կվերադարձնեն նրան, անգամ՝ եթե իր ամուսինը նրանց հրահանգել է մեծացնել տղային:
Կնոջ խոսքով՝ նա երբեք չի կասկածել, որ իր ամուսինն ահաբեկիչ է, և երբ իմացել է, որ նա իր տղայի հետ մեկնել է Սիրիա՝ պատերազմելու, ողջ աշխարհն իր համար փուլ է եկել:
















