Լոնդոնում ավտոբուսի վարորդները գործադուլ են անում՝ բողոքելով վարձատրության անհավասար պայմանների դեմ

10:43 • 13.01.15

Մեծ Բրիտանիայի մայրաքաղաքի ավտոբուսային տրանսպորտի վարորդները, այդ թվում՝ ողջ աշխարհով հայտնի երկհարկանի «դաբլդեքերներինը», գործադուլ են սկսել՝ բողոքելով վարձատրության անհավասար պայմանների դեմ: Գործադուլը կտևի մինչև չորեքշաբթի օրվա՝ հունվարի 14-ի առավոտ, հաղորդում է ТАСС-ը:

 

Ենթադրվում է, որ օրվա ընթացքում գործադուլին կմասնակցի մոտ 27 հազար վարորդ: Ինչպես հայտնել է գործադուլի կազմակերպիչ հանդես եկող Unite արհմիությունը, վարորդները մտադիր են փոխել իրավիճակը, երբ «միևնույն աշխատանքի» համար մի քանի տրանսպորտային ընկերությունների աշխատակիցներ ստանում են տարբեր աշխատավարձեր: Այժմ տարբերությունը կարող է կազմել ժամը 3 ֆունտ ($4,5)՝ 9,3 ֆունտից մինչև 12,3 ֆունտ ($14,5 - $19):

 

«Քաղաքում գործում է 18 տրանսպորտային ընկերություն, և յուրաքանչյուրը վարորդի հետ սեփական աշխատանքային պայմանագիրն է կնքում»,- բացատրել է Unite-ի շրջանային բաժնի ղեկավար Ուեյն Քինգը:

 

«Մենք հասնում ենք նրան, որ նրանք մշակում են միասնական սակագնային ցանց, որը կներառի քաղաքի ավտոբուսային տրանսպորտի ոլորտի բոլոր աշխատակիցներին»,- հավելել է նա: