Ամստերդամում թուրք հետազոտող Ուգուր Ումիթ Ունգորը դասախոսություն կկարդա Հայոց ցեղասպանության թեմայով

10:41 • 14.01.15

Ամստերդամում Հայոց ցեղասպանության 100-րդ տարելիցին նվիրված միջոցառում կկազմակերպվի հունվարի 30-ին:

Նախատեսվում է, որ դասախոսություն կկարդա Ուտրեխտի համալսարանի պատմության դասախոս և Պատերազմի, Հոլոքոստի և ցեղասպանության հետազոտությունների ինստիտուտի (NIOD) գիտաշխատող դոկտոր Ուգուր Ումիթ Ունգորը` «Ցեղասպանության պատճառների և ընթացքի» մասին:

Այդ օրը կազդարարվեն Նիդերլանդներում և այլ վայրերում Հայոց ցեղասպանության 100-րդ տարելիցին նվիրված միջոցառումների ծրագրերը:

Միջոցառումը կազմակերպվել է Հոլանդահայ կազմակերպությունների ֆեդերացիայի (FAON) «Ապրիլ 24 կոմիտեի» և Հայ ուսանողական «Գլաձոր» միության (ASV Gladzor) համագործակցությամբ:

Այս մասին «Արմենպրես»-ին տեղեկացրել են Նիդերլանդների «Աբովյան» մշակութային միությունից: