Գյումրեցիներին չբավարարեց Գևորգ Կոստանյանի պատասխանը. վերջինս հեռացավ

17:43 • 15.01.15

Ինչպես երեկ Գյումրիում ՌԴ-ի 102-րդ ռազմաբազայի մոտ հավաքված գյումրեցիներին խոստացել էին, այսօր ՀՀ գլխավոր դատախազ Գևորգ Կոստանյանը Շիրակի մարզի դատախազության շենքի առջև պատասխանեց հավաքված գյումրեցիների հարցերին: Նա վստահեցրեց, որ հունվարի 12-ին Գյումրիի Ավետիսյանների ընտանիքի սպանության մեղավորը պատասխանատվության է ենթարկվելու ՀՀ տարածքում:


Գյումրեցիների հարցին, թե ինչու այդ դեպքում ռուս զինվորականները ՀՀ իրավապահներին չեն հանձնում գործող մեղադրյալ Վալերի Պերմյակովին, պատասխանեց. «Հանձման մասին հարցը քննարկվում է այն ժամանակ, երբ տվյալ անձը երկրի սահմաններից դուրս է լինում։ Նկատի ունենալով, որ տվյալ դեպքում ունենք երկրի սահմաններում գտնվող անձի վերաբերյալ հարց, նման բան չի քննարկվել»:


Մեկ այլ հարցին, թե մեղավորը Հայաստանո՞ւմ է պատիժը կրելու, թե՞ ՌԴ-ում և արդյո՞ք ՀՀ դատարանն է իրականացնելու արդարադատություն, գլխավոր դատախազը պատասխանեց. «ՀՀ-ի տարածքում իրականացվելու է արդարադատությունը: Հիմա չի քննարկվում այդ հարցը՝ որ դատարանն է քննելու գործը: Ոչ թե ես հարցի պատասխանը չգիտեմ, այլ հիմա չի կարող քննարկվել այդ հարցը: Ես դրա պատասխանը ո՞նց տամ»։


Մեկ այլ հարցի, թե իրավազորության հարց քննարկվե՞լ է, դատախազը պատասխանեց, որ այն լուծված է ՀՀ-ի և ՌԴ-ի միջպետական պայմանագրով:


Գյումրեցիներին դատախազի պատասխանը չգոհացրեց և նրանք սկսեցին աղաղակել: Գևորգ Կոստանյանն առաջարկեց, որ 10-15 հոգով բարձրանան աշխատասենյակ ու քննարկեն հարցը, ինչին որևէ մեկը չհամաձայնեց: Դատախազը հեռացավ:


Գյումրեցիներից մեկն ընդգծեց, որ իրենց պահանջն անփոփոխ է՝ գործով մեղադրյալ Վալերի Պերմյակովին փոխանցել ՀՀ իրավապահ մարմիններին և որ դատաքննությունն իրականացվի ՀՀ դատարանում:

«Ասպարեզ» ակումբի նախագահ Լևոն Բարսեղյանն իր հերթին ընդգծեց, որ երեկ իրենք հստակ ձևակերպել են իրենց պահանջը, և այլ բան իրենց հետաքրքիր չէ:


«Դատախազությունը օրենքը շատ լավ գիտի ու ունի իր ուզածով մեկնաբանելու գիտելիքները: Էնպես չէ, որ իրենք մեր պահանջը չեն հասկնա, մեզի համար արդեն ամեն ինչ պարզ է, էլ հարց չունինք: Մենք եկել ենք, որ իմանանք մեր պահանջի մասին պատասխանի լուրը: Քննությունը իրականացնող գլխավոր մարմինը պետք է լինի ՀՀ-ն, ռուս քննիչները կարող են միայն մասնակցել: ՀՀ դատարանում պետք է դրանց դատը լինի, ուրիշ ոչ մի տեղ: Պատիժը պետք է կրե կամ կրեն ՀՀ-ում, ցանկացած 7-րդ դասարանի երեխա հասկացել է մեր պահանջը: Իշխանությունն էլ հասկըցել է, եթե գիտելիք չունեն հարցը գլուխ բերելու, մենք էդ մարդկանց տեղը գիտենք, եթե դուխ չունին, ստեղ իրանց դուխը հավաքված է»,-ասաց նա:


Շիրակի մարզի գլխավոր դատախազ Րաֆֆի Ասլանյանն էլ հորդորեց, որ 30-ական մարդ բարձրանան գլխավոր դատախազի մոտ՝ հարցը քննարկելու համար, ինչի հետ գյումրեցիները չհամաձայնեցին, փոխարենը վանկարկեցին՝ «դուրս արի, դուրս արի…»: