Մահացել է Գյումրիի սպանդից փրկված 6–ամսական Սերյոժա Ավետիսյանը
Գյումրեցի փոքրիկի` Սերյոժա Ավետիսյանի կյանքը փրկել չի հաջողվել. այս մասին Tert.am-ի հետ զրույցում ասաց ՀՀ առողջապահության նախարարության մամուլի խոսնակը։
Երևանի «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանի տեղեկացմամբ` երեկ երեկոյան վեց ամսական Սերյոժա Ավետիսյանի առողջական վիճակը կտրուկ վատացել էր: Հունվարի 19-ին, ժամը 17:02-ին երեխայի մոտ արձանագրվեց կենսաբանական մահ:
Չնայած տեղի և արտերկրի առաջատար մասնագետների կողմից ձեռնարկված վերակենդանացման շարունակական, երկարատև, անընդմեջ միջոցառումներին` ցուցանիշները բարելավել չհաջողվեց, զարգացավ սրտանթային, թոքային, երիկամային անբավարարություն. անդառնալի փոփոխություններ տեղի ունեցան, որը հանգեցրեց մահվան:










