Մոտ մեկ տոննա հերոին տեղափոխելու մեջ մեղադրվող վրացի վարորդն անմեղ է. փաստաբան
ՀՀ պետական սահմանին ձերբակալված, գրեթե մեկ տոննա հերոին տեղափոխելու մեջ մեղադրվող Ավթանդիլ Մարտիաշվիլիի փաստաբան Թեյմուրազ Մասուրաձեն այսօր մամուլի ասուլիսին հայտարարեց, որ իր պաշտպանյալն անմեղ է և իր մեղավորությունը քրեական գործով ապացուցված չէ:
«Նրա նկատմամբ առաջադրված մեղադրանքը հակասում է նախաքննության և դատաքննության ընթացքում ձեռք բերված ապացույցներին»,- ասաց նա:
Փաստաբանը նկատեց, թե մեղադրական եզրակացության մեջ «մեծ քանակություն» ասված հերոինը տարբեր կշիռներով է ներկայացված և նշված չէ, թե թվերից որ մեկն է ճիշտ:
Նրա խոսքով՝ փորձաքննությունը պարզել է,որ վարորդը նույնիսկ չի էլ կասկածել, թե ինչ է տեղափոխում: «Գրեթե մեկ մլնդ դոլար արժողությամբ մեկ տոննա հերոինը անցել է Իրանի մաքսակետը և չի նկատվել»,- ասաց նա:
Թեյմուրազ Մասուրաձեն կասկած ունի, որ այս ամենում կրիմինալ տարր կա և այս գործն արվել է ահաբեկչության ֆինանսավորման նպատակով:
Ըստ նրա`այս ամենը կազմակերպվել է Թուրքիայի քաղաքացիներ Նարգիզ եղբայրների կողմից, և այդ մասին վկայել է նաև մեքենայի սեփականատեր թուրք Օսման Ույուղլին, սակայն այդ եղբայրների նկատմամբ հետախուզում չի հայտարարվել:
«Կան փաստարկներ, որ Ավթանդիլ Մարտիաշվիլիին ոչինչ չի իմացել և չէր էլ կարող իմանալ, ինչը հաստատվել է քննչական մարմիների կողմից, իսկ դատախազության դիրքորոշումն անհասկանալի է»,- ասաց նա և հայտնեց, որ դատախազը իր պաշտպանյալի համար 18 տարվա ազատազրկման միջնորդություն է ներկայացրել, իսկ մեքենայի սեփականատիրոջ համար` 20 տարվա:
Փաստաբանը կարծում է, որ դատախազության կողմից նման մեղադրանք իր պաշտպանյալին առաջադրելու մեջ ինչ-որ ճնշում կա: Հայտնենք, որ վաղը Գորիսի դատարանում տեղի կունենա պաշտպանական ճառը:










