Արմեն Աշոտյանը Լոնդոնում ներկայացրել է Հայաստանի բարձրագույն կրթության ոլորտի բարեփոխումները
Մեծ Բրիտանիայի մայրաքաղաք Լոնդոնում մեկնարկել է կրթության նախարարների համաշխարհային համաժողովը, որին մասնակցում են ավելի քան 500 պատվիրակներ 82 երկրներից, այդ թվում շուրջ 40 նախարարներ:
ԿԳ նախարարությունից հայտնում են, որ համաժողովին մասնակցում է նաև ՀՀ կրթության և գիտության նախարարության պատվիրակությունը՝ նախարար Արմեն Աշոտյանի գլխավորությամբ:
Մինչև համաժողովի պաշտոնական բացման արարողությունը, ՀՀ կրթության և գիտության նախարար Արմեն Աշոտյանը Բրիտանական խորհրդի կենտրոնակայանում հանդիպում է ունեցել Բրիտանական խորհրդի ղեկավարների հետ և մասնակցել «Որակի ապահովումը բարձրագույն կրթության ոլորտում» քննարկմանը:
Նախարարը համառոտ ներկայացրել է Հայաստանում բարձրագույն կրթության բարեփոխումները, մասնավորապես, կրթության որակի ապահովմանը միտված աշխատանքների ընթացքը:
«Կրթության ոլորտում որակի ապահովման համար անհրաժեշտ համակարգային բարեփոխումները Հայաստանում արդեն իսկ իրականացված են: Ներկայումս լայնածավալ աշխատանքներ են տարվում ուսումնական հաստատություններում կրթության որակի ապահովման մեխանիզմների լիարժեք ներդրման ուղղությամբ»,- իր ողջյունի խոսքում նշել է Արմեն Աշոտյանը:










