Միհրան Պողոսյանը հերքեց լուրերը, թե ինքը կապ ունի էկզոտիկ մրգերի ներմուծման հետ
ՀՀ գլխավոր հարկադիր կատարող, գեներալ-մայոր Միհրան Պողոսյանի հրավիրված մամուլի ասուլիսի ընթացքում լրագրողներից մեկը հետաքրքրվեց, թե արդյոք ԵՏՄ անդամակցությունից հետո էկզոտիկ մրգերի ներմուծումն ավելի նպաստավոր պայմաններում է հայտնվել: «Ավելի ճիշտ կլինի ուսումնասիրեք, թե որ կազմակերպություններ են զբաղվում և տնօրեններին հարցնեք»,- ասաց նա և չշարունակեց արձագանքել այն դիտարկմանը, թե ում է պատկանում «Քեթրին» ընկերությունը:
Միհրան Պողոսյանը նշեց, որ ինքը, ինչպես ցանկացած պետական պաշտոնյա, բիզնես չունի, բիզնես չունեն նաև ընտանիքի անդամները՝ կինը և դպրոցահասակ երեխաները: Ինչ վերաբերում է բարեկամներին, ապա՝ «եթե փնտրեք, բնականաբար, կգտնվեն երրորդ, չորրորդ կարգի բարեկամներ, որոնք զբաղվում են բիզնեսով»:
Հարցին, թե ում է պատկանում «Ֆրեշ» սուպերմարկետների ցանցը և Կեչառիս հյուրանոցը, Միհրան Ծառուկյանը պատասխանեց, թե գույքն իրենն է, և տվել է վարձակալության այլ կազմակերպության, իսկ Կեչառիսը կապ ունի իր բարեկամների հետ, որի անունը նա չհնչեցրեց:
Լրագրողները հետաքրքրվեցին նաև մամուլում շրջանառվող տեղեկությունից, ըստ որի՝ ԴԱՀԿ պետը գումարային վեճ է ունեցել «Սթար» խանութների ցանցի սեփականատեր Գևորգ Աֆանդյանի հետ, որին նա պարտքով 5 մլն 146 հազար 842 դոլար էր տվել և չէր կարողանում հետ վերցնել:
Հարցին, թե ինչ գումարի մասին է խոսքը և որտեղից պաշտոնյանին այդքան գումար, Միհրան Պողոսյանը նշեց, որ գաղտնիք չէ, որ մինչև պետական պաշտոնյա լինելն ինքը բիզնեսներ է ունեցել: «Կային որոշակի շենք-շինություններ, որոնք տրված էր վարձակալության տարբեր տնտեսվարող սուբյեկտների: Պարզապես տվյալ դեպքում եղել էր պայմանագիր, որի ժամանակ պետք կատարեին պարտավորություններ։ Այդ պարտավորությունները չի կատարել որպես քաղաքացի դիմել է դատարան»:
Նա նշեց, որ համաձայնության են եկել, և հարցը որոշակի չափով լուծվել է:










