Եթե Պերմյակովին հանձնելը չի բացառում Լեբեդևը, ուրեմն հասարակության պահանջը տպավորություն թողել է. Բ. Նավասարդյան
Եթե այն մասին, որ Ռուսաստանը չի հրաժարվում վերադարձնել Պերմյակովին , ասում է Ռուսաստանի լիբերալ-դեմոկրատական կուսակցության՝ ավելի շատ ազգայնական ընտրազանգվածի վրա խաղացող քաղաքական ուժի ներկայացուցիչը, հնարավոր է ենթադրել, որ Հայաստանի հասարակության արձագանքը որոշակի տպավորություն թողել է:
Ter.am –ի հետ զրույցում նման կարծիք հայտնեց Երևանի մամուլի ակումբի նախագահ Բորիս Նավասարդյանը :
Բորիս Նավասարդյանը սենսացիա չի որակում ՌԴ պետդումայի պատգամավոր Օլեգ Լեբեդևի հիշյալ հայտարարությունը. «Որովհետև ո՛չ Հայաստանից Պերմյակովին հանձնելու պահանջ կա, ո՛չ էլ Ռուսաստանից պաշտոնական պատասպան, որ դա մերժվում է: Ուղղակի այդ հարցի քննարկումը, մեկնաբանությունները հուշում են, որ Ռուսաստանը հակված չէ հանձնել նրան: Բայց պարզ է, որ իրավիճակը ուսումնասիրվում է՝ և՛ բուն գործը, և՛ հասարակության արձագանքը: Փորձում են հասկանալ, թե չհանձնելու տրամադրությունները որքան ուժեղ են Ռուսաստանում, հանձնելու տրամադրությունները՝ Հայաստանում: Եվ այդ երկուսը հաշվարկելուց հետո ինձ թվում է՝ վերջնական որոշում կլինի»:










