ՀՀԿ-ն ծանոթ չէ Զ. Փոստանջյանի՝ Գյումրիի մասին ԱԺ հայտարարության նախագիծը
ԱԺ «Հանրապետական» խմբակցությունը ո´չ միայն չի քննարկել, այլև՝ ծանոթ չէ Զարուհի Փոստանջյանի՝ «2015թ. հունվարի 12-ին Գյումրիում տեղի ունեցած դաժան սպանությունների կապակցությամբ» ԱԺ հայտարարության նախագծին:
Այս մասին Tert.am –ի հետ զրույցում հայտնեց ՀՀԿ խմբակցության ղեկավար Վահրամ Բաղդասարյանը՝ ավելացնելով.«Ուրեմն ՝ ողջ հայ ժողովուրդն է պահանջում, որպեսզի լինի արդար նախաքննություն, դատավարություն, և դուք՝ լրագրողներդ, իրեն խորհուրդ տվեք, որ ընդհանրապես ձեռնպահ մնա նման մեկնաբանություններից՝ նման իրավիճակում: Քննությունը գնում է շատ նորմալ, և՛ հայկական, և՛ ռուսական կողմերը շահագրգռված են, որ իրականությունը բացահայտվի»:
Հիշեցնենք, որ ՀՀ ԱԺ-ում շրջանառության մեջ է դրվել ԱԺ «Ժառանգություն» խմբակցության քարտուղար Զարուհի Փոստանջյանի՝ «2015թ. հունվարի 12-ին Գյումրիում տեղի ունեցած դաժան սպանությունների կապակցությամբ» ԱԺ հայտարարության նախագիծը, որում բավականին կոշտ շեշտադրումներ կան: Մասնավորապես՝ նշվում է, որ Ռուսաստանի Դաշնության ԱԴԾ սահմանապահ կառավարման ղեկավար մարմինների կողմից Հայաստանի Հանրապետության սահմանը խախտող անձի փոխանցումը 102-րդ ռազմաբազայի ղեկավարությանը խախտում է Հայաստանի Հանրապետության Սահմանադրությունը, Հայաստանի Հանրապետության Քրեական և Քրեական դատավարության օրենսգրքերի և «Հայաստանի Հանրապետության տարածքում տեղակայված ռուսաստանյան սահմանապահ զորքերի կարգավիճակի և դրանց գործունեության պայմանների մասին» (30 սեպտեմբերի, 1992թ.) և «Հայաստանի Հանրապետության տարածքում ռուսաստանյան ռազմաբազայի մասին» (16 մարտի 1995 թ.) Հայաստանի Հանրապետության և Ռուսաստանի Դաշնության միջև կնքված պայմանագրերը:
ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը նույնպես ասաց, որ ծանոթ չէ նախագծին, ու ավելացրեց, որ քննարկման համար դեռ բավական ժամանակ կա:










