Շվեդիայի 6 քաղաքում Ցեղասպանությունը ճանաչելու կոչեր են հնչել

16:06 • 26.01.15

Շվեդիայի 6 քաղաքի հրապարակներում հունվարի 25-ին հազարավոր ասորիներ են հավաքվել՝ հիշեցնելով 1915թ.-ի հայերի, նաև ասորիների և Պոնտոսի հույների դեմ իրականացված ցեղասպանության մասին:

 

Ինչպես տեղեկացնում է Demokrat Haber թուրքական կայքը, հավաքվածները Թուրքիայի կառավարությունից պահանջել են ճանաչել Ցեղասպանությունը:

 

Միջոցառումներն անցկացվել են միաժամանակ: Դրանք ուղեկցվել են նաև երթերով:

 

Ցույցերի ու երթերի մասնակիցները «Թուրքիայի 100-ամյա ժխտումն ամոթալի է» պաստառներ են պարզել:

 

Նրանք կոչ են արել թուրքական պետությանը վերջ դնել ժխտողական քաղաքականությանը, առերեսվել անցյալին ու ճանաչել ցեղասպանությունը:

 

Հավաքվածները նշել են, որ ցեղասպանությունները դեռ շարունակվում են, քանի որ անցյալի ցեղասպանություններին առերեսում տեղի չի ունեցել: Հիշեցրել են, որ «Իսլամական պետություն» խմբավորման զինյալներն այսօր էլ շարունակում են ցեղասպանություն գործել ասորիների և այլ փոքրամասնությունների դեմ: