Մուսուլման հոգևորականը «սելֆին» մեղք է համարել
Մուսուլման հոգևորականը «սելֆին» (ինքնալուսանկար) մեղք է համարել՝ պնդելով, որ նրանք, ովքեր «սելֆի» են անում, տրվում են հպարտությանը, ցուցամոլությանը և գոռոզամտությանը, գրում է The Daily Mail-ը:
Հայտնի ինդոնեզացի հոգևորական Ֆելիքս Սիաուն մի քանի գրառում է արել սոցցանցում՝ բացատրելով, թե ինչու «սելֆիներից» պետք է խուսափել, բայց իր զայրույթն ուղղել է մեծավմասամբ կանանց, ովքեր, նրա խոսքով, «անամոթ» են և «ոչ մաքուր»:
Սիաուն, մասնավորապես, գրել է. «Այս օրերին շատ մուսուլման կանայք «սելֆի» են անում առանց ամաչելու»:
Նա նաև ասել է, որ քանի որ «սելֆի» անողները ցանկանում են սոցիալական մեդիաներում դիտումներ ունենալ, նրանք ի ցույց են դնում իրենց և տրվում են ամենասարսափելի մեղքին՝ գոռոզամտությանը:
Այնուամենայնիվ այս հաղորդագրություններն առաջացրել են Twitter-ի շատ օգտատերերի քննադատությունը, որոնք սկսել են իրենց «սելֆիները» տեղադրել սոցիալական ցանցում:










