Ակցիայի մասնակիցները որոշեցին երթով վերադառնալ Կառավարության շենքի մոտ ու այնտեղ ևս ներկայացնել իրենց պահանջը (ուղիղ)

12:12 • 29.01.15

16։07

 

Ակցիայի մասնակիցները մինչև վաղը ժամը 11-ը ժամանակ տվեցին իշխանությանը՝ պատասխանել իրենց, այլապես 10 օրով կփակեն իրենց խանութները և չեն վճարի հարկեր:
ՓՄՁ ներկայացուցիչները խոստացան վաղը նշված ժամին կլինեն Կառավարության շենքի առջև:


«Եթե օրենքը փետրվարի 1-ից ուժի մեջ մտնի, ուրեմն մենք դիմումներ կգրենք ու կկասեցնենք անհատ ձեռներեցի մեր գործունեությունը։ Կփակենք մեր խանութները 10 օրով, չենք վճարի հարկեր ու սոցիալական վճարներ»,- ասաց ակցիայի մասնակիցների մեկը:


Տիգրան Խաչատրյանն էլ նշեց, որ նախագահական գալով, իրենք ցանկանում էին իշխանության բոլոր օղակներին տեղյակ պահել խնդրի մասին, բոլորը հասկանան ստեղծված իրավիճակը և թույլ չտան, որ օրենքն ուժի մեջ մտնի:


«Այս օրենքը չի կարող բյուջե լցնել, միայն կաշառակերների գրպանները կլցնի: Խնդրում եմ չբաժանվենք իրարից, իրենք սպասում են, որ մենք պակասենք ու օգտվեն դրանից, դրա համար , խնդրում եմ բոլորին ասեք միանան մեզ, որովհետև սա Հայաստանի 99%-ի հարցն է»,- ասաց նա:


Ակցիայի մեկ այլ մասնակից էլ բարձրախոսով Սերժ Սարգսյանին հորդորեց աշխատանքից հեռացնել ՀՀ ֆինանսների փոխնախարար Արմեն Ալավերդյանին։


Ակցիայի մասնակիցները որոշեցին երթով վերադառնալ Կառավարության շենքի մոտ, այնտեղ ևս ներկայացնել պահանջը և բաժանվել՝ վաղը ժամը 11-ին կրկին հավաքվելու պայմանով:


15։39

 

Ակցիայի մասնակիցներից Տիգրան Խաչատրյանը հայտարարեց, որ ցանկանում են՝ իրենց ձայնը լսելի լինի նախագահին:


«Մենք չպետք է խախտենք ոչ մի օրենք, քաղաքակիրթ, դաստիարակված մարդիկ ենք ու այս երկրի քաղաքացիներն ենք: Կոչ եմ անում չտրվել ոչ մի սադրանքի: Մենք պահանջում ենք անձնապես կամ միջնորդավորված լսել Նախագահի արձագանքը»,- ասաց նա։


Բաղրամյան պողոտայում է նաև Երևանի ոստիկանության պետ Աշոտ Կարապետյանը: Լրագրողների հարցին, թե լարվածություն է զգացել պողոտայում այդ պատճառով է եկել, պատասխանեց, որ ինքն իր գործառույթն է իրականացնում:


«Ես եկել եմ ծառայություն ստուգելու, նայելու: Ծառայությունը շատ ճիշտ է արվում ու վերջում ես նրանց շնորհակալություն կհայտնեմ: Իրավիճակը լարված չէ, վերահսկելի է մեր ոստիկանության կողմից»,- ասաց նա:


15։12

Ոստիկանությանը ի վերջո հաջողվեց կարգուկանոն հաստատել Բաղրամյան պողոտայում: Այս պահին ակցիայի բոլոր մասնակիցները նախագահական նստավայրի դիմացի մայթին են հավաքվել: Իսկ նախագահական նստավայրի դարպասներից այն կողմ ակցիային են հետևում ՀՀ նախագահի թիկնազորի անդամները:


15։05


Այս պահին քաղաքացիները փակել են Բաղրամյան պողոտան և փորձում են մոտենալ նախագահական նստավայրի դարպասներին, ինչը թույլ չի տալիս ՀՀ ոստիկանությունը: Ոստիկանները պատ են կազմել և փորձում են հեռացնել քաղաքացիներին փողոցից և բոլորին դուրս բերել նախագահական նստավայրի դիմացի մայթ:


Ակցիայի մասնակիցները միաբերան վանկարկում են՝ «Կա-սե-ցում»:
 


15։00

 

Մինչ նախագահական նստավայրի մոտ հասնելը ակցիայի մասնակիցները նախ կանգ առան Ազգային ժողովի դիմաց: Մասնակիցներից Տիգրան Խաչատրյանը հիշեցրեց, որ հենց ԱԺ-ի միջոցով է ընդունվել օրենքը:


«Նորից կոչ եմ անում՝ ի լուր բոլոր պատգամավորների. մենք բոլորս հավաքվել ենք ու դա լավ օրից չէ: Հավաքվել ենք ստիպված, հավաքվել ենք պայքարելու, մեր հանապազօրյա հացը վաստակելու իրավունքի համար: Այսօր ձեզնից շատերի ընտրությամբ օրենքը ուժ է ստացել: Ձեր եղբայրները քույրերը պահանջում են ձեզնից, որ դուք արտահայտեք ձեր դիրքորոշումները, որպեսզի մեզ համար հասկանալի դառնա, ով ինչպես է մտածում, ինչքանով է շահագրգռված ժողովրդի շահերը պաշտպանելու հարցում»,- ասաց նա:


Արտակ Խաչատրյանն ընդգծեց, որ պատգամավորներից ակնկալում են շուտափույթ լուծում:


13։57

 

Կառավարության շենքի մոտ հավաքված ՓՄՁ ներկայացուցիչները այս պահին երթով շարժվում են դեպի նախագահական նստավայր:


Նրանց են միացել ՓՄՁ ներկայացուցիչներ Գյումրիից, Գավառից, Մարտունիից, Էջմիածնից, Հոկտեմբերյանից և Աբովյանից:


13։40

Դեռ չէր լրացել ցուցարարների՝ Կառավարությանը տված մեկ ժամ ժամանակը, երբ նրանց մոտեցավ Կառավարության դիմումների ու նամակների բաժնի պետ Ալեքսանդր Ղազարյանը և հայտնեց, որ ՀՀ վարչապետ Հովիկ Աբրահամյանը ծանրաբեռնված աշխատանքային գրաֆիկ ունենալու պատճառով նրանց չի կարող ընդունել: 


Նշենք, որ Ալեքսանդր Ղազարյանը նկատեց, որ ցուցարարները երեք օր առաջ բաց էին թողել տասը հոգանոց պատվիրակությամբ հանդիպելու հնարավորությունը:


Հիշեցնենք, որ այդ օրը օրենքի փոփոխությունների դեմ պայքարող առևտրականները թիկունքով կանգնեցին Կառավարության շենքին՝ նշելով, որ Կառավարությունն էլ իրենց է թիկունք արել:


Կառավարության ներկայացուցչին սուլոցներով ճանապարհ դնելուց հետո, ներկաները նշեցին, որ սա սպիտակ եղեռն է:


Առևտրական Արտակ Խաչատրյանը հայտարարեց, որ Գյումրիի տոնավաճառների աշխատակիցներին, որոնք պետք է միանային իրենց, չի հաջողվել հասնել մայրաքաղաք՝ ավտոտեսուչների հարուցած խոչընդոտների  պատճառով:


13։03

 

Եթե կառավարությունը մեկ ժամվա ընթացքում չպատասխանի իրենց 3 ամսվա ընթացքում գրված նամակներին, և չասի, թե ինչ լուծում է տեսնում, ապա մեկ ժամից առևտրականները կշարժվեն Բաղրամյան 26:


Սա հստակեցվեց հընթացս, քանի որ մինչ այդ ասվել էր, որ «կդիմենք ուրիշ քայլերի»:


Մինչև կսպասեին, ինքնաբուխ ելույթները շարունակվեցին և  առևտրականներից մեկը հայտարարեց, որ սրանով Կառավարությունը ցույց է տալիս իր իմպոտենցիան: Նա, իհարկե, նշեց, որ սա չպետք է հասկանալ բառացի, ասելով, որ չանձնավորեն, իրենք ոչ մեկին չեն ուզում վիրավորել:


Մեկ այլ տղամարդ ներկայացնելով որոշ վիճակագրություն՝ ասաց, որ այսօր Հայաստանում կա 70 հազար անհատ ձեռնարկատեր՝ գրանցված կամ չգրանցված, և  այս փոփոխություններով Կառավարությունը  700  հազար շնչի  զրկում է  հացից:


Եթե, այնուամենայնիվ, որոշեն, որ գնալու են Բաղրամյան 26, զգուշացվեց, որ գնալու են «կուլտուրական»՝ «կուլտուրական երթով»:


Նշենք, որ այս ընթացքում առևտրականները սուլոցներով դիմավորում են կառավարության շենք ելումուտ անող տարբեր պաշտոնյաների:


12։43

Եթե այսպես շարունակվի, փետրվարի 1-ից ոչ մեկս հարկ չի վճարելու, ոչ մեկս չի աշխատելու, լինելու է համահայկական գործադուլ: Այս մասին հայտարարեց բողոքի ակցիան կազմակերպող տղամարդը, ով հայտարարել էր, որ Կառավարության ընդունարանից իրեն ասել են, որ չկա «կոմպետենտ մարդ, ով վերևներին կտեղեկացնի , թե ինչ է կատարվում ներքևում»:


«Կա-սե-ցում» վանկարկումները ժամանակ առ ժամանակ ընդմիջվում են հայտնի «պայքար, պայքար մինչև վերջ»-ով։


Նախքան այդ, ակցիայի մասնակիցները իրենց հետագա քայլերը որոշելուց հետո, անցել էին ելույթներին:


Նախ, տոնավաճառի առևտրականները շնորհավորեցին բոլորին՝ Հայկական բանակի օրվա կապակցությամբ, որը ընդունվեց ծափահարություններով:


Հանրահավաքի կազմակերպիչներից մեկը ով հայտարարեց, որ այսօր առևտրականները ավելի շատ են, քան 3-4 օր առաջ, նշեց, որ մարդիկ են միանալու նաև մարզերից:


Բրաձրախոսով տղամարդը նշեց, որ այս անգամ չպետք է անցնել կոռեկտության սահմանը՝ նկատելով, որ առևտրականները  խուժան չեն: Նա, ըստ ամենայնի, նկատի ուներ նախորդ անգամ Ֆինանսներին փոխնախարար Արմեն Ալավերդյանի նկատամամբ իրականացված «պո՜ւ» ակցիան:


«Ոչ թե մեզ էին տվել 3 ամիս ժամանակ, որ փաստաթղերը կարգի բերեինք, այլ մենք էինք 3 ամիս տվել   Կառավարությանը, որ  խոշոր  բիզնեսին բերեին հարկային դաշտ, որ  պահանջեին, որ իրենք էլ մեզ  տրամադրեին այդ փաստաթղթերը: Չե՛նք դադարեցնելու մեր պայքարը: Մեզ  պետք չէ հարկերից ազատել, դիտել որպես ոչ հարկատու, պարտավոր ենք հարկ մուծել, մենք   էս երկրում ենք   ապրելու, աշխատելու,   մեր Կառավարությունը պարտավոր է մեզ համար ստեղծել բարեկեցիկ պայմաններ»,- հայտարարեց առևտրականը:
 


«Շրջանառության հարկի  մասին օրենքի» փոփոխությունների դեմ բողոքող առևտրականները  այսօր կրկին բողոքի ակցիա են անում Կառավարության վարչական շենքի մոտ։

«Հարցնում են՝  առևտուրը կանգնա՞ծ է, ես ասում եմ՝ առևտուրը պառկած է»,- բողոքում է տոնավաճառներից մեկի առևտրականը:

Նրա կողքին կանգնած տղամարդը լրացրեց.«Մարդիկ ուզում են, որ մեր շորերն էլ հանենք, գնա՞նք, չլո՞ւտ: Պետությանը հարկ են վճարում, արենդատորին, բազմապիսի հարկ ենք վճարում»:

Հիշեցնենք, որ ըստ այդ փոփոխությունների՝ շրջանառության հարկը 3,5%-ից կնվազի մինչև 1%: Միաժամանակ, տնտեսվարողները պարտավորվելու են գործունեություն ծավալել հստակ փաստաթղթաշրջանառությամբ:

Հիշեցնենք նաև, որ նախորդ բողոքի ակցիայի ժամանակ առևտրականները չցանկացան հանդիպել Կառավարության ներկայացուցչին և ի նշան բողոքի՝ մեջքով կանգնեցին Կառավարությանը։
 

Առևտրականները նշում են, որ այլընտրանքային լուծումը կլինի այն, ինչ առաջարկել է Փոքր և միջին ձեռնարկատիրությունների ընկերակցությունը:

 

 Ուղիղ եթերը՝ «Ազատություն TV»-ի