Ռուսաստանցիների 44%-ը կարծում է, որ Պերմյակովի դատը պետք է անցկացվի Հայաստանում
Հայաստանի Գյումրի քաղաքում կատարված զանգվածային սպանության և դրան հաջորդած անկարգությունների մասին գիտի ռուսաստանցիների մեծամասնությունը (68%), սակայն 1/3-ը (32%) ոչինչ չի լսել այդ մասին, գրում է Интерфакс-ը՝ հղում անելով «Լևադա-կենտրոնին»։
Հարաբերական մեծամասնությունը կարծում է, որ այս գործի քննությունը պետք է վարեն ռուս և հայ քննիչները (48%), դատը պետք է լինի ռուսական (42%), սակայն անցկացվի Հայաստանի տարածքում (44%)։
Այն մասին, որ գործով պետք է զբաղվեն ռուս քննիչները, ասել է հարցվածներից յուրաքանչյուր 5-րդը՝ 25%, հայերը՝ 21%։ Դժվարացել են պատասխանել հարցման մասնակիցների 6%-ը։
Հարցումն անցկացվել է հունվարի 23-26-ը 1.600 մարդու շրջանում՝ ՌԴ 46 շրջանի 134 բնակավայրում։
Դատական լսումները պետք է վարի հայկական դատարանը՝ կարծում է 37%-ը, դժվարացել է պատասխանել 21%-ը։
Այն հարցում, որ դատական լսումները պետք է անցկացվեն Ռուսաստանում, վստահ է հարցվածների 35%-ը, 21%-ը դժվարացել է պատասխանել։
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի զինծառայող Վալերի Պերմյակովը։
Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս և հանձնել 102-րդ ռուսական բազայի հրամանատարությանը:










