Դուխները չի հերիքում խոշորներին բռնեն, որովհետև նրանք բարձրադիր իշխանությունների կողմից են երաշխավորված. Ռ. Հակոբյան
«Ժառանգություն» խմբակցության պատգամավոր Ռուբեն Հակոբյանը «Շրջանառության հարկի մասին» օրենքի քննարկմանը ներկայացնելով խմբակցության տեսակետը՝ լավ մշակույթ համարեց երեկ վարչապետի՝ Ազգային ժողով գալը:
«Հանդիպմանը ֆիքսեցինք ժամկետ, որ հաջորդ քառօրյայում համատեղ մենք կբերենք նախագիծ: Լավ կլինի, որ մեկտեղվեն մեր մտահոգությունները, մեր մոտեցումները: Մենք ուզում ենք, որ օրենքում դոմինանտ տեղ հատկացվի կամավորության սկզբունքին: Քաղաքակա՞ն դաշտում պետք է լուծվի այս հարցը, թե՞ տնտեսական, իմ կարծիքով՝ քաղաքական»,-ասաց նա:
Ռուբեն Հակոբյանը նշեց, թե առկա է 10-15 «մոնոպոլիստ», ովքեր դուրս են օրենքի դաշտից, որոնց վրա որևէ օրենք չի ազդում, և անում են այն, ինչ ուզում են: «Նրանք հիմնականում ներկրողներն են: Նրանց սպոնսորը բարձրադիր իշխանություն է: Մեզ մոտ ներկրումը 4 անգամ ավելի շատ է, քան արտահանումը, դա նշանակում է, որ մենք խոսում ենք մեռնող տնտեսության մասին»,-նշեց նա:
Ռուբեն Հակոբյանը հավելեց, թե այդ «մոնստրների» անունները ցանկացած վերջին գյուղում բոլորն անգիր գիտեն։










