Ուզբեկստանում տեղեկացել են «Իսլամական պետության» կողմից նախապատրաստվող ահաբեկչությունների մասին

10:58 • 03.02.15

Ուզբեկստանում միջոցներ են ձեռնարկվում պետական սահմանի ամրապնդման ուղղությամբ՝ պետության տարածքում ահաբեկչական գործողություններ իրականացնելու «Իսլամական պետություն» խմբավորման անդամների մտադրության մասին երկրի հատուկ ծառայությունների տեղեկությունների ֆոնին, հաղորդում է interfax.ru-ն:

 

«Մենք ենթադրություններ ունենք, որ Ուզբեկստանում ձերբակալված ԻՊ-ի մասնակիցների գործունեությունը չի սահմանափակվում միայն անդամագրման ուղղությամբ տարվող աշխատանքներով: ԻՊ-ի անդամներն Ուզբեկստանի տարածքում 2015 թվականի գարնանը մի շարք ահաբեկչական գործողություններ են պատրաստում, այդ պատճառով մենք ուժեղացնում ենք սահմանների պահպանության ուղղությամբ միջոցները»,- ասել է Ազգային անվտանգության ծառայության վերլուծաբանը:

 

Նա հայտնել է, որ իրավապահ մարմինների տրամադրության տակ են գտնվում ԻՊ-ի աջակիցների, ինչպես նաև Ուզբեկստանում 2014 թվականի նոյեմբեր-դեկտեմբերին ձերբակալված անդամների վկայությունները:

 

Մասնագետները սահմանների անվտանգության ամրապնդման մեկ այլ պատճառ են նշում Աֆղանստանում ափիոնի մեծ բերքը և Ուզբեկստանում մարտի 29-ին նախատեսված նախագահական ընտրությունները: