ԱՄՆ-ում կայացել է Ազգային աղոթքի ավանդական նախաճաշը՝ Հայոց ցեղասպանության ոգեկոչմամբ
Այսօր Վաշինգտոնում ընթանում է Ազգային աղոթքի նախաճաշը (National Prayer Breakfast): Այս տարի միջոցառման շրջանակներում նշանավորվելու է նաև Հայոց ցեղասպանության հարյուրամյա տարելիցը:
Ինչպես հայտնում է sudanreeves.org-ը՝ Ազգային աղոթքի նախաճաշը ամենամյա ավանդական միջոցառում է, որն անցկացնում է ԱՄՆ-ի Կոնգրեսը: Այս տարի Աղոթքի նախաճաշը նշվում է 62-րդ անգամ: Դրա շրջանակներում հրավիրվում է հյուրերի լայն շրջանակ՝ ԱՄՆ-ի հիսուն նահանգից և ավելի քան 100 երկրից:
Արարողության նպատակն է՝ նպաստել զանազան սոցիալական և կրոնական խմբերի հանդիպմանն ու շփումներին: Այս տարի միջոցառման գլխավոր հյուրերն են ԱՄՆ-ի նախագահ Բարաք Օբաման և Դալայ Լաման:
20.15
Օբաման իր ելույթում ասել է. «Կրոնի ազատությունը այն արժեքն է, որ պաշտպանելու ենք այստեղ՝ տանը, և դրա զորավիգն ենք լինելու ամբողջ աշխարհում»:
Այժմ միջոցառման տարբեր հյուրեր իրենց շնորհակալական աղոթքն են հնչեցնում ներկաների առաջ:
20.44
Օբաման ասել է, որ անձամբ իր համար այս արարողությունը հնարավորություն է՝ հայացք նետելու իր սեփական «հավատի ուղևորությանը»: Նա նկատում է, որ ԱՄՆ-ն աշխարհի ամենակրոնական երկրներից է, սակայն ԱՄՆ-ում կրոնն ու պետությունն առանձին են:
Օբաման իր ելույթում անդրադարձել է թե' պատմականորեն (Խաչակիրներ, ինկվիզիցիա և այլն), թե' հենց մեր օրերում (եզդիների կոտորածներ Իրաքում, քրիստյաների սպանություններ Նիգերիայում, ահաբեկչություններ պակիստանյան դպրոցում և Փարիզում) կրոնի ընկալումների աղավաղումներից: Նա նաև խոսքի ազատությունը կապել է կրոնի ազատության հետ:
ԱՄՆ-ի նախագահը նաև մեջբերումներ է արել իսլամի, հուդայականության, քրիստոնեության դրույթներից, որոնք կոչ են անում դիմացինին՝ անել այն, ինչ ինքդ ես քեզ կամենում:
Օբաման, սակայն, իր խոսքում որևէ ձևաչափով չի հիշատակել Հայոց ցեղասպանությունը, որի ոգեկոչմանը այս տարի կոչված է Ազգային աղոթքի նախաճաշը:
Փոխարենը ամերիկյան ԶԼՄ-ները մատնանշում են հակասությունը, որ այս տարի տեղ է գտել միջոցառմանը. դրան հրավիրված է Սուդանի արտգործնախարար Ալի Ահմեդ Քարթին, որը մեղադրվում է Խարտումի կոտորածների համար:




















