ԵՄ-ն անհատական մոտեցում կցուցաբերի գործընկեր պետությունների նկատմամբ. գիտաժողով

16:08 • 12.02.15

Գլոբալիզացիայի և տարածաշրջանային համագործակցության վերլուծական կենտրոնը  (ԳՏՀՎԿ) և ՀՀ-ում Լատվիայի Հանրապետության դեսպանատունն այսօր կազմակերպել էին  «Լատվիական նախագահության առաջնայնությունները Եվրոպական միությունում և Հայաստանի հետ համագործակցության ոլորտները» միջազգային գիտաժողով:


Գիտաժողովին ՀՀ-ում Լատվիայի Հանրապետության դեսպան Էլիտա Գավելեն նկատեց, նպատակ ունեն հեռանկարների մասին քննարկումներ իրականացնել և հասկանալ, թե ինչպես կարելի է ուժեղացնել Արևելյան գործընկերության համաձայնագրից դուրս եկած երկրների հետ համագործակցությունը:


«Լատվիան Հայաստանին միշտ էլ համարել է կարևոր գործընկեր և մեր քաղաքականությունը միշտ եղել է բաց և կառուցողական»,-ասաց նա և նկատեց, թե իրենք անհրաժեշտություն են համարում շեշտել, որ վերահաստատում են հարավկովկասյան պետությունների կարևորությունը:


«Մենք ցանկանում ենք վերահաստատել Արևելյան հարևանության ծրագիրը որպես մեր քաղաքականության մաս և նշել, որ նպատակն է ամրապնդել համատեղ հարթակ: Կարևորն է գույքագրել ձեռք բերած առաջընթացը և պատրաստել Արևելյան գործընկերության տեսլականը: Մենք նաև հասկանում ենք, որ համագործակցության անհատական մոտեցում  պետք է լինի յուրաքանչյուր  պետության հետ՝ հաշվի առնելով երկրի ցանկությունները»,-ասաց նա:


ՀՀ-ում ԵՄ պատվիրակության ղեկավար Տրայան Հրիսթեան մինչ իր խոսքը սկսելը նշեց. «Ինչքան փոքր է աշխարհը, ինչքան մոտ ենք եղել անցյալում և հուսով ենք ապագայում դեռ կհամագործակցենք»:


Դեսպանը նշեց, թե սա իսկապես այն պահն է, երբ Լատվիան պետք է ներկայացնի իր առաջնայնությունները, քանի որ ԵՄ խորհրդի նախագահողի սաղավարտն է կրում և ինչի հետ համաձայն են ԵՄ երկրները:


ԵՄ դեսպանը նշեց, որ հարաբերությունների զարգացումների համար կարևոր է, որ հիմնական առաջնահերթությունը վերաբերի Արևելյան գործընկերության շրջանակին, որը թույլ կտա կողմերին շարունակել նաև ապագայում, քանի որ դրանց հիմքում ընկած է միասնական նվիրումը միջազգային հիմնական նորմերին, հիմնարար ազատություններին:


Հրիսթեան նշեց, որ ԵՄ-ն մեծ հետարքրքությամբ հետևելու է  մայիսի 21, 22-ին Ռիգայում նախատեսված գագաթաժողովին, որի ժամանակ էլ հնարավորություն կլինի հստակեցնել  Արևելյան գործընկների հետ հարաբերությունների ապագայում ռազմավարությունը խորացնելու հարաբերությունները:


«ԵՄ-ն հնարամիտ գաղափարներ է առաջադրում գործընկեր պետություններին, այն է՝ հատուկ հարաբերություններ նշանակել յուրաքանչյուր պետության համար»,-ասաց նա: