Լուկաշենկոն պատմել է Պուտինի ճկունության, Մերկելի մարդկայնության ու Օլանդի բարության մասին
Բելառուսի նախագահ Ալեքսանդր Լուկաշենկոն կարծում է, որ Ուկրաինայի հարցով Մինսկում տեղի ունեցած բանակցությունների ընթացքում կողմերն արդյունքի են հասել ՌԴ նախագահ Վլադիմիր Պուտինի ճկունության, Գերմանիայի կանցլեր Անգելա Մերկելի մարդկայնության և Ֆրանսիայի նախագահ Ֆրանսուա Օլանդի բարության շնորհիվ, տեղեկացնում է РИА Новости գործակալությունը:
«Անկեղծ ասած՝ ես չէի ակնկալում, որ Օլանդն այդքան բարի է»,- ասել է նա: Լուկաշենկոն պատասխանել է նաև հարցին, թե ինչ զգացողություններ է ունեցել երկար ընդմիջումից հետո արևմտյան առաջնորդների հետ շփվելուց հետո:
Բելառուսի նախագահը նշել է, որ Օլանդը շատ շփվող, բարի և զգույշ մարդ է: «Ինչ վերաբերում է Անգելա Մերկելին, ապա նրա մոտ մարդկայնությունը բոլոր այլ մարդկային որակներից առաջ է անցնում: Չնայած նա նման որակներ շատ ունի»,- ասել է նա:
Լուկաշենկոն, սակայն, նշել է, թե այդ ամենը չի նշանակում, որ Բելառուսը հարթել է հարաբերություններն Արևմուտքի հետ:
Հիշեցնենք, որ Մինսկում օրերս կայացած «նորմանդական քառյակի»՝ Ուկրաինայի, Ռուսաստանի, Ֆրանսիայի և Գերմանիայի առաջնորդները պայմանավորվել են փետրվարի 15-ի ժամը 00։00-ից կրակը դադարեցնելու մասին: Այդ մասին հայտարարել էր Ռուսաստանի Դաշնության նախագահ Վլադիմիր Պուտինը:










