Կառավարությունում քննարկվել են շինարարության ոլորտի զարգացման հեռանկարները

17:01 • 16.02.15

Վարչապետ Հովիկ Աբրահամյանի գլխավորությամբ կառավարությունում տեղի է ունեցել շինարարության ոլորտի ներկայիս իրավիճակին և զարգացման հեռանկարներին նվիրված խորհրդակցություն, որին մասնակցել են պատկան գերատեսչությունների ղեկավարներ և ոլորտի ընկերությունների ներկայացուցիչներ:


Ողջունելով ներկաներին՝ վարչապետը կարևորել է նման ձևաչափով խորհրդակցության անցկացումը, որը լավ հնարավորություն է ոլորտի զարգացմանը խոչընդոտող խնդիրները վերհանելու և լուծման ուղիները համատեղ քննարկելու համար: Հովիկ Աբրահամյանը նշել է, որ կառավարության նպատակն է՝ հնարավորինս բացահայտել ոլորտում առկա խնդիրները և նպաստավոր պայմաններ ստեղծել շինարարության բնագավառում ներդրումային ծրագրերը խթանելու համար:


Խորհրդակցության ընթացքում ծավալվել է մտքերի շահագրգիռ փոխանակություն, որի ընթացքում պատկան գերատեսչությունների ղեկավարները պատասխանել են կառուցապատող շինարարական կազմակերպությունների ներկայացուցիչների բարձրացրած հարցերին՝ կառուցապատման նպատակով իրականացվող տարբեր գործընթացների, ինչպես նաև այլ ընթացակարգերի վերաբերյալ:


Վարչապետ Աբրահամյանն ընդգծել է շինարարության բնագավառում ներդրումային ծրագրերի խթանման անհրաժեշտությունը և կարևորել կառուցապատող ընկերությունների ու պատկան մարմինների հետևողական համագործակցությունը: Կառավարության ղեկավարը հանձնարարել է արծարծված խնդիրները հանգամանալից քննարկել շահագրգիռ կողմերից բաղկացած աշխատանքային խմբի շրջանակում և վարչապետին ներկայացնել լուծումների առաջարկություններ: