Ոչ ոք չի կարող ասել, որ Իրանի միջուկային ծրագիրը խաղաղ բնույթ չի կրում. Ռոհանի
Իրանի նախագահ Հասան Ռոհանին հայտարարել է, որ երկիրը միջուկային ոլորտում իր գործունեությունը թափանցիկ է դարձրել և, հետևաբար, ոչ ոք չի կարող երկրի միջուկային ծրագիրը խաղաղ չհամարել:
Ինչպես տեղեկացնում է իրանական IRINN կայքը, Ռոհանին այդ մասին հայտարարել է Թեհրանում «Չմիավորման շարժման» անդամ երկրների գիտության նախարարների հանդիպմանն ունեցած ելույթում:
«Նրանք, ովքեր պատժամիջոցներ են իրականացնում, լավ գիտեն իրանցի ժողովրդի ու կառավարության մտադրությունների մասին»,- ասել է նա:
Նախագահը նշել է, որ իսլամական հանրապետությունը նպաստում է գիտության զարգացմանը՝ գիտակցելով դրա դերը:
Նրա խոսքով՝ անդամ երկրների միջև համագործակցության բարելավման համար պետք է բարելավել գիտական չափանիշները, ինչը թույլ կտա աշխարհում խաղաղության հաստատման հարցում առաջընթաց գրանցել:
Ռոհանիի ելույթը հաջորդել է Իրանի փոխարտգործնախարարի և միջնորդ «վեցյակի» միջև Ժնևում կայացած բանակցությունների հերթական փուլին:










