«Աշ-Շաբաբը» սպառնում է ահաբեկչություններ կազմակերպել ԱՄՆ-ում և Բրիտանիայում
ԱՄՆ-ի ներքին անվտանգության նախարար Ջեհ Ջոնսոնը կոչ է արել ամերիկացիներին ուշադիր լինել արևմտյան երկրներում գտնվող առևտրի կենտրոնների վրա հարձակումներ իրականացնելու վերաբերյալ «Աշ-Շաբաբ» խմբավորման սպառնալիքից հետո, գրում է BBC-ի ռուսական ծառայությունը:
Ջոնսոնի խոսքով՝ ինքը չափազանց լուրջ է ընդունել Սոմալիի իսլամիստների սպառնալիքը:
Համացանցում հրապարակված տեսաուղերձում «Աշ-Շաբաբ»-ի անդամները կոչ են անում իրենց աջակիցներին հարձակումներ գործել ԱՄՆ-ում, Կանադայում և Մեծ Բրիտանիայում գտնվող առևտրի կենտրոնների վրա:
Տեսագրությունում իր դեմքը թաքցնող տղամարդը բրիտանական ակցենտով կոչ է անում «Աշ-Շաբաբ»-ի աջակիցներին հարձակվել Արևմուտքում «ամերիկացիներին և հրեաներին» պատկանող առևտրի կենտրոնների վրա:
Նա, մասնավորապես, հիշեցնում է ԱՄՆ-ում մեծությամբ երկրորդ առևտրի կենտրոնը՝ Mall of America-ն Մինեսոտայում, West Edmonton Mall-ը Կանադայում, ինչպես նաև Լոնդոնի գլխավոր աևտրային փողոց Օքսֆորդ-սթրիթը և Լոնդոնում երկու Westfield առևտրի կենտրոնները:
2013 թվականին Քենիայի մայրաքաղաք Նայրոբիում Westgate առևտրի կենտրոնի վրա «Աշ-Շաբաբ»-ի գրոհայինների հարձակման հետևանքով 67 մարդ է զոհվել:










