Թուրք քաղաքապետի պատասխանը Starbucks-ին. Ադանայում ցանցի սրճարանների վրա թուրքական դրոշներ են կախվել
Հայտնի Starbucks սրճարանային ցանցի Լոս Անջելեսում գտնվող մասնաճյուղերում տեղ գտած պաստառը, որում հայուհիները պատկերված էին թուրքական դրոշների ներքո, հանվել էին՝ հայերի բացասական արձագանքից հետո:
Ինչպես տեղեկացնում է թուրքական «Նոր սերունդ» պարբերականը, Ադանայի քաղաքապետը որոշել է պատժել թուրքական դրոշները հեռացնելու ցանցի նախաձեռնությունը:
Քաղաքապետ Հուսեյին Սոզլույի հրահանգով՝ համաշխարհային ցանցի՝ Ադանայում գտնվող սրճարանների վրա մեծ թուրքական դրոշներ են կախվել:
Թուրքական դրոշները կախելու պահին ադանացիները քաղաքապետարանի աշխատակիցներին ծափահարություններով են ողջունել:
Հիշեցնենք, որ միջադեպը տեղի էր ունեցել Կալիֆոռնիայի հայաշատ Լոս Անջելես քաղաքում:
Սրճարանների ցանցում տեղադրվել էին լուսանկարներ, որոնցում հայկական տարազով աղջիկները թուրքական դրոշների տակ էին պատկերված:
Թուրքական լրատվամիջոցները նշում են, որ Starbucks-ի պաշտոնյաները ներողություն են խնդրել հայերից՝ նշելով, որ իրենք ցանկացել են պարզապես երկրների ավանդույթները ներկայացնելու համար նման արշավ նախաձեռնել:
«Հայ հաճախորդներին պատճառած անհանգստության համար ներողություն ենք խնդրում»,- ասել են ընկերությունից և վճռել հեռացնել Թուրքիան ներկայացնող պաստառները:










