Հուսիթները Սաուդյան Արաբիայի վրա հարձակվելու որոշում չեն կայացրել՝ չնայած նման հնարավորություն ունեն. «Հեզբոլլահ»
Եմենում հուսիթների շարժման հրամանատարությունն այսօրվա դրությամբ չի կայացրել Սաուդյան Արաբիայի տարածքում գտնվող օբյեկտների ուղղությամբ հարվածներ հասցնելու մասին որոշում՝ չնայած նրան, որ նրանք ունեն նման հնարավորություն, կարծում է լիբանանյան «Հեզբոլլահ» շարժման առաջնորդ Հասան Նասրուլան, գրում է korrespondent.net-ը:
«Հրամանատարությունը, որը ղեկավարում է Եմենում ռազմական գործողությունները, այս պահին չի կայացրել Բաբ էլ-Մանդաբը (Կարմիր և Արաբական ծովերի միջև նեղուց) փակելու և Սաուդյան Արաբիայում թիրախների ուղղությամբ հարվածներ հասցնելու մասին որոշում՝ չնայած նրան, որ նրանք ունեն նման հնարավորություն»,- պատմել է Նասրուլան սիրիական հեռուստաալիքին տված հարցազրույցում:
Նրա կարծիքով՝ Սաուդյան Արաբիան չի հասել ոչ մի նպատակի Եմենում ռազմական գործողության ընթացքում: Հակառակը՝ օդային հարվածները եմենցիների մեծ մասին տրամադրել են Սաուդյան Արաբիայի դեմ: Գործողությունը Նասրուլան նկարագրել է որպես «աղետալի ձախողում»:
Նասրուլան կարծում է, որ «կուրությունը Սաուդյան Արաբիային բերել է «Ալ-Կաիդայի» և ԻՊ-ի պաշտպանությանը՝ նրանց զենք մատակարարելով, չնայած նրան, որ վերջիններս վտանգ են ներկայացնում Սաուդյան Արաբիայի անվտանգությանը»:
Հիշեցնենք, որ մարտի 26-ից միջազգային կոալիցիան Սաուդյան Արաբիայի և Պարսից ծոցի այլ երկրների մասնակցությամբ Եմենում ռազմական գործողություն է իրականացնում «Անսար Ալլա» շարժման աջակիցների դեմ, ովքեր վերահսկում են երկրի տարածքի մեծ մասը, ներառյալ՝ մայրաքաղաք Սանան:










