Նրանց ոգին անկոտրում է. Զ. Փոստանջյանը տեսակցել է Հիմնադիր խորհրդարանի անդամներին
ԱԺ «Ժառանգություն» խմբակցության պատգամավոր Զարուհի Փոստանջյանն այսօր հանդիպել է ժամանակավոր պահպան մեկուսարանում գտնվող Հիմնադիր խորհրդարանի անդամների հետ:
«Նրանց ոգին անկոտրում է: Բայց ես ուզում եմ ասել, որ 100 տարի առաջ՝ ապրիլի 24-ից առաջ, օսմանցիները ձերբակալում էի հայ տղամարդկանց, և 100 տարի անց նորից հայ տղամարդկանց ձերբակալում են»,- Էրեբունի վարչական շրջանի դատարանի դիմաց հավաքված բողոք-հանրահավաքին հայտարարեց Զարուհի Փոստանջյանը` հիշեցնելով, որ Ժիրայր Սեֆիլյանը արդեն երկրորդ անգամ է ապօրինի ձերբակալվում:
Նա հավելեց, որ իշխանությունները, եթե այդքան քաջություն ունեն, թող ձերբակալեն Վալերի Պերմյակովին:
Հիշեցնենք, որ այս գործի շրջանակներում ձերբակալվել է 5 անձ՝ Վարուժան Ավետիսյանը, Պավել Մանուկյանը, Գևորգ Սաֆարյանը, Ժիրայր Սեֆիլյանը, Գարեգին Չուգասզյանը։
Հիշեցնենք նաև, որ հարուցվել է քրեական գործ Քրեական օրենսգրքի 225-րդ հոդվածով ( 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների նախապատրաստության դեպքի» առթիվ):
Հանրահավաքին մասնակցում էին համակիրներ, իրավապաշտպաններ, երգիչ-երգահան Ռուբեն Հախվերդյանը, Նիկոլ Փաշինյանի կինն ու որդին, իսկ մասնակիցներից շատերը եկել էին եռագույն դրոշներով:
Հիմնադիր խորհրդարանի անդամ Վարդան Հակոբյանն էլ նկատեց, որ այսօր պատասխանատվության պահ է. «Ոչ մի քաղաքացի այսօր չի կարող նստել տանը և նայել, թե ինչ են անում այս երկրի հետ, ինչ են անում այս քաղաքացու հետ, այս պետության հետ, այս երկրի բնության հետ: Եվ քաղբանտարկյալների թիվը Հայաստանում ավելացավ ևս 6-ով, ամեն մեկը մի անհատականություն, ամեն մեկը մի նվիրյալ անձ, ցանկացած պետության համար` հպարտություն»:
Իսկ այն դիտարկմանը, որ իշխանության ներկայացուցիչներն ասում են, որ ապրիլի 24-ը սգալու ու ոչ թե զանգվածային միջոցառումներ անցկացնելու օր է, Ռուբեն Հախվերդյանը պատասխանեց: «Դե էսքան տարի սգում ենք: Ու եթե այդ բողոքի ցույցը լինի, դա միայն մի բան է նշանակում,որ գենոցիդը շարունակվում է, ես համաձայն եմ դրա հետ»,- ասաց երգիչը:
Եթե Ռուբեն Հախվերդյանի առողջությունը ների, ապա կմասնակցի ապրիլի 24-ի միջոցառումներին:
«Հայաստանում հնարավո՞ր է անցնցում իշխանափոխություն» հարցին ի պատասխան ասաց. «Ամեն ինչ կասիՎալոդ ձյաձյան»:










