Սիրիայում փախստականների «Յարմուկ» ճամբարը վերածվել է «մահվան ճամբարի». ՄԱԿ-ի գլխավոր քարտուղար

16:07 • 10.04.15

Դամասկոսի մոտակայքում գտնվող պաղեստինցի փախստականների «Յարմուկ» ճամբարը, որը գրավել են «Իսլամական պետություն» ահաբեկչական խմբավորման գրոհայինները, վերածվում է «մահվան ճամբարի»։ Այդ մասին հայտարարել է ՄԱԿ-ի գլխավոր քարտուղար Բան Կի Մունը։

 

Ինչպես փոխանցում է Deutsche Welle-ն՝ համաշխարհային կազմակերպության ղեկավարն անսովոր կտրուկ հայտարարությամբ նշել է, որ «սիրիական սարսափում «Յարմուկ» ճամբարն ամենասարսափելի դժոխքն է»։

 

Նա նշել է, որ ճամբարում գտնվող գրեթե 16.000 մարդ, որոնցից 3.500-ը՝ երեխաներ, օգտագործվում են ջիհադիստների կողմից որպես կենդանի վահաններ։ Բացի այդ, փախստականները տառապում են Սիրիայի նախագահ Բաշար ալ-Ասադի զորքերի կողմից ճամբարի ուղղությամբ արձակված հարվածներից։

 

««Յարմուկում» իրավիճակն էպիկական մասշտաբների հումանիտար աղետի է հասել։ Այն անհրաժեշտ է անհապաղ կայունացնել։ Մենք չենք կարող պարզապես կանգնել և նայել զանգվածային բռնություններին։ Մենք չենք կարող մարդկանց թողնել բախտի քմահաճույքին»,- ասել է Բան Կի Մունը։