Աշոտ Եղիազարյանի հայցի հետ կապված՝ սառեցվել են ՌԴ գործարար Սուլեյման Քերիմովի ակտիվները. Ведомости

11:12 • 14.04.15

Նիկոսիայի շրջանային դատարանը (Կիպրոս) սառեցրել է ռուսաստանցի հայտնի գործարար Սուլեյման Քերիմովի ակտիվները, ինչի մասին տեղեկացնում է vedomosti.ru-ն` վկայակոչելով դատավճիռը տեսած աղբյուրին:

 

Ըստ ամենայնի՝ սա կապված է Պետդումայի նախկին պատգամավոր Աշոտ Եղիազարյանի` անցած տարի Լոնդոնի միջազգային արբիտրաժային դատարան ներկայացրած հայցի հետ: Եղիազարյանի հայցի քննման արդյունքում Լոնդոնի դատարանը վճռել է, որ Քերիմովը հայազգի պատգամավորին պետք է 250 մլն դոլար փոխհատուցի:

 

Աղբյուրը մանրամասնում է, որ Եղիազարյանը 250 մլն դոլար է ներդրել «Մոսկվա» (ներկայում` Four Seasons Hotel Moscow) հյուրանոցի շինարարության մեջ, սակայն Քերիմովը վճարելու փոխարեն բողոքարկել է դատավճիռը:

 

Քերիմովի հիմնական ակտիվների կառավարմամբ զբաղվող «Նաֆտա-Մոսկվա» ընկերության ներկայացուցիչը հաստատել է փաստը, որ Կիպրոսի դատարանի կողմից ռուսաստանցի գործարարի ակտիվների սառեցումը պայմանավորված է Լոնդոնի միջազգային արբիտրաժային դատարանի վճռով:

 

Աղբյուրը հավելում է, որ «Մոսվա» հյուրանոցի շինարարության պատճառով Քերիմովի ու Եղիազարյանի միջև կոնֆլիկտը շարունակվում է արդեն 5 տարի: