ՌԴ-ում կենդանաբանական այգում այցելուների պատճառով շնաձուկը սատկել է նյարդային ցնցումից

22:42 • 15.04.15

Ռուսաստանի Կալինինգրադ քաղաքի կենդանաբանական այգում սատկել է սևալողակ շնաձուկը, որին այցելուները նյարդային ցնցման էին հասցրել:

Ինչպես հաղորդում է Lenta.ru-ն` վկայակոչելով կենդանաբանական այգու մամլո քարտուղար Եկատերինա Միխայլովային,  դիահերձման ժամանակ պարզվել է, որ կենդանու սիրտը շատ թույլ է եղել  և չի դիմացել ծանրաբեռնվածությանը: Մյուս բոլոր օրգանների աշխատանքը  կայուն է եղել:

«Շնաձկան այս տեսակը շատ կարճ է բնակվում անազատության մեջ: Մեր շնաձուկը լավ խնամքի շնորհիվ երկու տարի գոյատևել է կենդանաբանական այգում: Մասնագետների կարծիքով` դա բավականին երկար ժամկետ է», - նշել  է Միխայլովան:

Նրա խոսքով` կենդանաբանական այգին այլևս մտադիր չէ այդ ցեղատեսակի շնաձկներ պահել: