2015թ-ին պետական գնումների միջոցով ձեռք է կբերվի 2,5 միլիարդ դրամի դեղ. Արմեն Մուրադյան

14:58 • 18.04.15

2015 թվականին կարիքների համար պետական գնումների միջոցով ձեռք է կբերվի 2,5 միլիարդ դրամի դեղ:  Այս մասին այսօր մամուլի ասուլիսին հայտնեց ՀՀ առողջապահության նախարար Արմեն Մուրադյանը:  Նա նշեց, որ այս ոլորտում նորույթ է այն, որ շաքարային դիաբետով հիվանդներին անհրաժեշտ հաբերի ձեռքբերումն իրականացվելու է  անմիջապես արտադրողից:


Նա հիշեցրեց, որ հունվարի 30-ի ՀՀ կառավարության որոշմամբ նախատեսվում է շաքարային դիաբետով տառապող հիվանդների դեղերը ձեռք բերել հենց  անմիջապես ֆրանսիական «Սերվիե» ընկերությունից և արդյունքում  2015 թ-ի համար ձեռքբերվող «Դիաբետոն» մեկ դեղի համար կծախսվի 36, 7 դրամ, և տասը տոկոս կտրամադրվի նվիրատվություն` որպես հումանիտար օգնություն:


«Սա հնարավորություն  է տալիս ապահովել դեղամատակարարման 77 տոկոս ծածկույթ և տնտեսել շուրջ 60 միլիոն դրամ: Ամենակարևորը սա բնակչության գոհունակությունը առաջացրեց, քանի որ յուրաքանչյուրը ցանկանում էր  ստանալ ֆրանսիական արտադրության հաբեր»,- ասաց նա:


Ինչ վերաբերում է պատվաստանյութերին, նախարարն ասաց, որ աշխատանքներ տարվեցին և ՄԱԿ-ի մանկական հիմնադրամի կողմից, որը որ ամբողջ աշխարհով մատակարարում է այդ պատվաստանյութերը, կարողացան բանակցային ճանապարհով հասնել փաթեթային լուծման և նրանցից ստանալ այդ գնային առաջարկը, ինչը թույլ տվեց այդ ուղղությամբ 209 միլիոն դրամ տնտեսել և բարձր վարկանիշ ունեցող պատվաստանյութեր կիրառել: «Կարծում եմ, որ սա ևս մեծ ձեռքբերումներից մեկն է»,- ասաց նա:


Արմեն Մուրադյանը մատնանշեց, որ վերջին տարիներին շաքարային դիաբետի հետ կապված ինսուլինի ձեռքբերման համար կնքված 5 տարով  պայմանագիրը թույլ տվեց տարեկան տնտեսել միջինացված շուրջ 770 միլիոն դրամ և վերջին տարիներին 100 տոկոս ապահովվածություն տալ:


«Ծրագրերի իրականացման գրասենյակի կողմից շուրջ 600 հազար դոլարի չափով տնտեսումներ են եղել, որն այս տարի ուղղվելու է 5 նոր ամբուլատորիաների կառուցմանը»,-ասաց նա և ավելացրեց, որ այս տարի նաև նախատեսում են բացել 4 բժշկական կենտրոններ մարզերում` Կապանում, Բերդում, առողջության կենտրոն` Ճամբարակում և Մեղրիում»,-ասաց նա:


Նախարարն անդրադառնալով դեղերի ոլորտին` նշեց, որ իրենք փոփոխություն են իրականացրել  դեղորայքային ներմուծման և ավելի պարզեցրել են ԵՏՄ երկրներից բերվող դեղերի հնարավոր ցանկերը, կարճացրել են ժամկետները հաշվի առնել, որ գնային քաղաքականությունը տարբեր էր: «Հնարավորություն ընձեռեցինք, որ մեր գործարարները ավելի հեշտացված ճանապարհով ձեռք բերեն»,- ասաց  նաև հավելեց, որ սակայն դա չի լինի ի հաշիվ որակի: Նա ասաց, որ հանդիպել են  դեղագործական կազմակերպությունների ղեկավարների հետ և դեղերի գների իջեցման միտումներ կան: