«Շողակն» ժողովրդական համույթը Երևանում հանդես կգա համերգով

Աշխարհահռչակ «Շողակն» համույթը մենահամերգով հանդես կգա Երևանում` մայիսի 22-ին, ժ. 20.00` Բաղրամյան 17 հասցեում գտնվող «32 Թատրոնում»:

«Շողակն» համույթի երգն ու երաժշտությունն ավանդական է, մաքուր, հարուստ, բազմագույն և զգացմունքային: Համույթն այսօր աշխարհին է ներկայացնում պատմական Հայաստանի տարբեր շրջանների հայ ավանդական երգն ու երաժշտությունը՝ իր առաքելությունը համարելով ժողովրդական արվեստի հանդեպ կոմիտասյան ավանդույթների պահպանման և սերունդներին փոխանցելու կարևորագույն գործը:

«Շողակն» համույթը հիմնադրվել է 1995թ.՝ Երևանում:  Համույթը  կատարում է հայ ավանդական երաժշտություն՝ ներկայացնելով ժողովրդական երգը և նվագարանները` դուդուկ, զուռնա, դհոլ, քանոն, քամանչա, շվի, բլուլ, ուդ և դափ:

Շողակն համույթի երաժիշտներն են՝ ՀՀ ժողովրդական արտիստներ Գևորգ Դաբաղյանը  /դուդուկ, զուռնա/, Հասմիկ Հարությունյանը /վոկալ, ուդ/, Կարինե Հովհաննիսյանը /քանոն/, Լևոն Թևանյանը /շվի, թավ շվի, բլուլ/, Վարդան Բաղդասարյանը /քամանչա/, ինչպես նաև՝ Ալեքսան Հարությունյանը /վոկալ, դափ/, Կամո Խաչատրյանը /դհոլ/ և Գրիգոր Թաքուշյանը /դուդուկ դամ/:

Համույթը մենահամերգներով հանդես է եկել ԱՊՀ երկրներում, Եվրոպայում, Մերձավոր Արևելքում և ԱՄՆ-ում՝ կատարողական բարձր մակարդակով ներկայացնելով հայ  ժողովրդական և գուսանական արվեստը:

2000թ.-ից «Շողակն» համույթն ակտիվ շրջագայում է համերգներով՝ հանդես գալով աշխարհի ամենահեղինակավոր  դահլիճներում և փառատոներում, ինչպիսիք են «Սմիթսոնյան Մետաքսի ճանապարհ» /ԱՄՆ/,  «Ռուդոլշտադտ» /Գերմանիա/, «Theatre de la Ville» /Փարիզ/:

2004  և 2008 թթ. «Շողակնը» համերգային շրջագայություն է ունեցել ԱՄՆ-ում, մենահամերգներով հանդես է եկել «Carnegie Hall», «Kimmel Center» դահլիճներում: Անսամբլի երաժիշտների բարձրարվեստ և ինքնատիպ կատարումներն ընդգրկվել են Ատոմ Էգոյանի «Արարատ» ֆիլմում: 2014թ. «Շողակն» համույթը նաև համերգներ է ունեցել Շվեյցարիայում և Պորտուգալիայում՝ Լիսաբոնի Գյուլբենկյան կենտրոնում:

«Շողակն» համույթը և  մենակատարները ամերիկյան «Traditional Crossroads» և  շվեյցարական «Face Music» ընկերությունների հետ համատեղ թողարկել են բազմաթիվ ձայներիզներ, որոնք իրենց տեսակի մեջ լավագույններից են, արժանացել են միջազգային և հայաստանյան հեղինակավոր մրցանակների և աշխարհում մեծ ճանաչում ունեն: