Պուտինի նախկին կինն ամուսնացել է. ռուսական լրատվամիջոց

Կոռուպցիայի դեմ պայքարի հիմնադրամը ստուգել է Ռուսաստանի Դաշնության նախագահ Վլադիմիր Պուտինի նախկին կնոջ ազգանվան փոփոխության և նրա կողմից անշարժ գույքի հետ կապված գործողությունների իրականացման մասին փաստաթղթերը, որոնք ավելի վաղ հրապարակել էր «Սոբեսեդնիկ» ամսագիրը։ Այդ մասին հայտնել է հիմնադրամի աշխատակից Գեորգի Ալբուրովը, գրում է tvrain.ru-ն։

«Օզերո» կոոպերատիվի ստեղծման մասին փաստաթղթում որպես Վլադիմիր Պուտինի հասցե նշվում է բնակարան, որը 2015 թվականի հուլիսի 23-ին անցել է Լյուդմիլա Պուտինայի քրոջը, իսկ օգոստոսի 24-ին՝ արդեն Լյուդմիլա Օչերետնայային: Նրա անունը, հայրանունը, ծննդյան ամսաթիվը և վայրը համընկնում են Լյուդմիլա Պուտինայի տվյալների հետ։

Նշվում է, որ Լյուդիմիլա Պուտինան երկար ժամանակ է՝ հովանավորում է Միջանձնային հաղորդակցությունների զարգացման կենտրոնը, որը ղեկավարում է 37-ամյա Արթուր Օչերետնին: «Սոբեսեդնիկ» ամսագիրն իր հետաքննությունում հենց նրան է անվանել Լյուդմիլա Պուտինայի նոր ամուսին։

Նյութում նաև ասվում էր, որ Օչերետնայա ազգանունով նոր անձնագիր է ստացվել 2015 թվականի փետրվարի 2-ին։

Վլադիմիր Պուտինը և նրա կինը հայտարարել էին ամուսնալուծության մասին 2013 թվականին: