Մակեդոնիան արդեն եղած փշալարերին զուգահեռ նոր փշալարեր է տեղադրում Հունաստանի հետ սահմանին (լուսանկարներ)

Մակեդոնիան սկսել է արդեն եղած փշալարերին զուգահեռ նոր փշալարեր տեղադրել Հունաստանի հետ սահմանին, որպեսզի է՛լ ավելի դժվարացնի ներգաղթյալների համար երկիր մուտք գործելու հնարավորությունը, հաղորդում է The Daily Mail-ը։

Նոյեմբերից ի վեր միայն Սիրիայից, Աֆղանստանից և Իրաքից փախստականներին է թույլ տրվել անցնել սահմանը դեպի Արևմտյան Եվրոպա իրենց ճանապարհին, բայց այլ երկրներից ներգաղթյալները, այնուամենայնիվ, փորձեր կատարել են անցնել այդ սահմանը։

«Գաղափարն այն է, որ ուղերձ հղենք ներգաղթյալներին, որ կրկնակի ցանկապատ կա, այնպես որ նրանք հրաժարվեն անօրինական ճանապարհով սահմանն անցնելու մտքից»,- ասել է բարձրաստիճան զինվորական պաշտոնյան։

Տարեսկզբից ի վեր ավելի քան 68.000 փախստական է մտել Մակեդոնիա։ Ոստիկանության տվյալներով՝ իրենք միայն հունվարին մոտ 4 հազար մարդու են կանգնեցրել սահմանն անօրինական անցնելու փորձի ժամանակ։