Ճապոնիայի վարչապետը խոստովանել է, որ կնոջը շների համար նախատեսված սննդային հավելում է տվել

Ճապոնիայի վարչապետ Սինձո Աբեն խորհրդարանում իր ելույթի ընթացքում պատմել է, թե ինչպես է սխալմամբ կնոջը շների համար նախատեսված բիոհավելում տվել, տեղեկացնում է Lenta.ru-ն։

Սինձո Աբեն պարզաբանել է, որ գնել է Ճապոնիայում հայտնի հակաօքսիդանտը՝ չկասկածելով, որ հենց նման արտադրանք կա նաև շների առողջության պահպանման համար։

«Մի անգամ կնոջս սեզամին եմ տվել: Նա ամբողջը խմեց, և հետո միայն մենք իմացանք, որ դա կենդանիների համար նախատեսված սեզամին էր»,-խոստովանել է վարչապետը։

Գործչի կինը Ճապոնիայում հայտնի է իր ճաշակով և նուրբ հումորով։

Վարչապետը չի հաղորդել շների համար նախատեսված նյութի համային հատկանիշների մասին:

Սեզամինը սննդային հավելում է, որը հակաօքսիդանտ հատկություններ ունի: Քունջութի սերմերից պատրաստված նյութն օգտագործվում է նյութափոխանակության, մաշկի մաքրության ու թարմության պահպանման համար։