Բուլղարիայի վարչապետը սպանության սպառնալիքով և փամփուշտով ծրար է ստացել

Բուլղարիայի վարչապետ Բոյկո Բորիսովն անանուն նամակ է ստացել, որում եղել է սպանության սպառնալիք։

Ծրարում, որն ուղարկվել է նախարարների խորհրդի շենք, եղել է Բորիսովի լուսանկարը, փամփուշտ և ուղերձ թերթերից կտրված տառերով, գրում է segodnya.ua-ն։

Հատուկ ծառայությունները սկսել են միջադեպի առնչությամբ ստուգումները:

Բորիսովը հաստատել է, որ իրեն սպանությամբ են սպառնում։ Նա նշել է, որ զարմացած չէ սպառնալիքներից այն բանից հետո, երբ ավելի քան 1.7 մլրդ դոլար է առգրավել մաքսանենգներից և հեռացրել է մի շարք բարձրաստիճան պաշտոնյաների:

«Ոչ առաջին և ոչ էլ վերջին անգամը չէ, երբ մաքսանենգներից մոտ 3 մլրդ լև ես խլում և ձեռնարկում ես այլ գործողություններ, միշտ էլ կարելի է պատասխան գործողություններ ակնկալել»,- ասել է Բորիսովը:

Հիշեցնենք, որ փետրվարի 22-ին Բորիսովը պաշտոնից ազատել էր փախստականների հարցով պետական գործակալության ղեկավար Նիկոլայ Կազակովին։