Ինչպես կարձագանքեն շարքային ամերիկացիները 12-ամյա աղջկա ու 65-ամյա տղամարդու «ամուսնությանը» (լուսանկարներ, տեսանյութ)

Երբեմն որևէ գլոբալ խնդրի մասին առավել հստակ պատկերացում կազմելու ու դրա կարևորությունը գիտակցելու համար անհրաժեշտ է, որ այդ ամենը տեղի ունենա անմիջապես մարդու աչքի առաջ:

Առաջնորդվելով այս սկզբունքով` բլոգեր Քոբի Փերսինը որոշել է Նյու Յորքի կենտրոնում ուշագրավ սոցիալական փորձարկում անցկացնել` մանկահասակ աղջիկներին տարեց տղամարդկանց կնության տալու տարածված պրակտիկայի խնդրի վերաբերյալ:

Ինչպես նշում է The Daily Mail-ը, այդ նպատակով Փերսին Նյու Յորքի ամենամարդաշատ հատվածներից մեկում` Թայմս Սքուեր հրապարակում, կազմակերպել է 65-ամյա տղամարդու ու 12-ամյա աղջկա «ամուսնությունը»:

21-ամյա երիտասարդը պատմել է, որ այս փորձարկումն իրականացրել է մանկահասակ աղջիկներին կնության տալու վերաբերյալ շարքային ամերիկացիների արձագանքը պարզելու, ինչպես նաև նրանց այս խնդրի մասին ավելի տեղեկացված դարձնելու համար:

Դատելով ստորև հրապարակված տեսանյութից` կարելի է հասկանալ, թե որքան բացասական վերաբերմունք ունեն անցորդներն այս երևույթի հանդեպ։