Նավթային ճգնաժամի պայմաններում Ադրբեջանի նախագահը պատանդ է իր հոր ժառանգությանը. Reuters

Եթե Ադրբեջանի նախագահ Իլհամ Ալիևը ցանկանա դուրս բերել իր նավթ արտահանող երկիրը տնտեսական ճգնաժամից, նա ստիպված կլինի վճռականություն ցուցաբերել, որը նկատելի չի եղել հորը հաջորդած պաշտոնավարման 13 տարիների ընթացքում, հաղորդում է Reuters գործակալությունը։

Ալիևը դիմակայում է իր նախագահության օրոք ամենամեծ ճգնաժամին, երբ նավթի համաշխարհային գների անկման հետևանքով ազգային արժույթն արժեզրկվել է մեկ երրորդով, ինչն էլ հանգեցրել է տնտեսական անկման և քաղաքացիական դժգոհությունների։

Ինչպես գրում է լրատվամիջոցը, մարդիկ, ովքեր գիտեն Ալիևին, ասում են, թե նա կոմպետենտ կառավարիչ է և ձեռնարկել է կարևոր քայլեր՝ ճգնաժամը հաղթահարելու համար: Բայց որոշ մեկնաբաններ նշում են, որ երկարաժամկետ լուծումն իրական տնտեսական բարեփոխումն է, որը չի կարող իրականացվել Ալիևի խորհրդականների և նախարարների պատճառով, որոնց նա ժառանգել է իր հորից և որոնցից նա ստիպված է հրաժարվել։

Լրատվամիջոցը գրում է, որ Ալիևն իր կյանքի մեծ մասն անց է կացրել իր հոր ստվերի ներքո, ով աղքատ մարդուց դարձել է Խորհրդային միությունում բարձրաստիճան պաշտոնյա: Իր իշխանության վերջին տարիներին Հեյդար Ալիևը գործարքներ է կնքել այնպիսի ընկերությունների հետ, ինչպիսիք են BP-ը և Statoil-ը՝ Կասպից ծովի շրջակայքում նավթ արդյունահանելու համար։

Մեծավմասամբ այդ գործարքների և հետագայում նավթի արտահանումից ստացած եկամուտներն են ապահովել Ադրբեջանի արագ տնտեսական աճը, այդ պատճառով ներկայիս տնտեսական անկումը ցնցում է երկրի համար, գրում է Reuters-ը։

Մինչ տնտեսական աճի արդյունքում երկրում երկնաքերեր և շքեղ բնակարանային համալիրներ ու հյուրանոցներ էին կառուցվում, երկրի բնակչության մեծ մասը շարունակում էր աղքատության մեջ ապրել, գրում է կայքը։

Վերջին ամիսներին ոստիկանությունը սկսել է արցունքաբեր գազ, ջրցան մեքենաներ և մահակներ օգտագործել փողոցային ցույցերը ցրելու համար, եզրափակում է լրատվամիջոցը։