Լրագրողական 3 ՀԿ-ներ Մհեր Սեդրակյանի վարքը քննելու հարցով դիմել են էթիկայի հանձնաժողով

ՀՀԿ խմբակցության պատգամավոր Մհեր Սեդրակյանի կողմից լրագրողին հայհոյելու դեպքի առիթով լրագրողական երեք հասարակական կազմակերպություններ դիմել են Ազգային ժողովի էթիկայի ժամանակավոր հանձնաժողով: Այս մասին Tert.am-ին ասաց լրագրող Փայլակ Ֆահրադյանը: 

Ըստ նրա՝  հանձնաժողով են դիմել «Լրագրողների միավորում», «Մեդիա և իրավունք» և «Ազատ լրագրողների ասոցիացիա» ՀԿ-ները:

Հիշեցնենք, որ ՀՀԿ պատգամավոր Մհեր Սեդրակյանը ԱԺ-ում լրագրողներին «նախիր» էր անվանել, որից hետո հայհոյել էր իրենից պարզաբանում խնդրող լրագրողին:

Փայլակ Ֆահրադյանը նշեց, որ լրագրողներին «նախիր» որակելը դիմումում չեն ընդգրկել՝ հաշվի առնելով, որ այդ փաստը, ըստ էության, տեսանյութերում չկար:

«Դիմումում ներառել ենք միայն հայհոյելու հանգամանքը, քանի որ հայտնի է, որ վիրավորանքի պահը ֆիքսված չէ: Իհարկե, հետո Մհեր Սեդրակյանը հայտարարել է, որ նման արտահայտություն արել է, բայց նշել է, թե պարզապես գործընկերներին անեկդոտ է պատմել և այն լրագրողներին չի վերաբերել»,- ասաց Փայլակ Ֆահրադյանը:

Էթիկայի հանձնաժողովի ԱԺ քարտուղար Լիանա Սիմոնյանը Tert.am-ին ասաց, որ դիմումն այսօր են ստացել և կանոնակարգի համաձայն 10-օրյա ժամկետում այն ուսումնասիրելուց  հետո որոշում կկայացվի՝ դիմումն ընդունվում է վարույթ, թե՝ ոչ: