Գյումրիի անօթևանների խնդրի լուծմանը միացել են Մադրիդի «Ռեալը», «Բարսելոնան», Ազնավուրը, հայ լեգենդար մարզիկներ

Գյումրիի անօթևան 13 ընտանիքներին բնակարաններով ապահովելու նպատակով SOS Գյումրի թիմի նախաձեռնությանը Ֆեյսբուքյան էջով այս պահի դրությամբ  արձագանքել են աշխարհի երկու հզորագույն ֆուտբոլային ակումբները` Մադրիդի «Ռեալն» ու «Բարսելոնան», աշխարհահռչակ երգիչներ Շառլ Ազնավուրը և  Սերժ Թանկյանը: Նախաձեռնությանը միացել են հայ անվանի ֆուտբոլիստներ  Յուրա Մովսիսյանը և Հենրիխ Մխիթարյանը`բարեգործական աճուրդի համար տրամադրելով իրենց մարզաշապիկները:

Այս մասին  Tert.am-ին  հայտնեց նախաձեռնության անդամ Արեն Մկրտչյանը:
Նա նշեց, որ մարտի 19-ին` «Սարգիս Մուրադյան» պատկերասրահում  նախատեսվում է  անցկացնել բարեգործական աճուրդ,  որի լոտերի թվում են լինելու Մադրիդի «Ռեալի» ֆուտբոլիստների  ստորագրությամբ մարզաշապիկները `«Օգնել Գյումրու անօթևաններին» կոչով:
««Բարսելոնա» ֆուտբոլային ակումբի ներկայացուցիչ Սենիկ Կարապողոսյանը մեզ  է տրամադրել ակումբի 2009 թվականի դրոշը /երբ ակումբը նվաճեց բոլոր հնարավոր ու անհնար տիտղոսները Tert.am/  Մեսսիի, Չավիի և  այլ   աստղերի ստորագրություններով»,-տեղեկացրեց նախաձեռնության անդամը:

Լոտերի ցանկում են  ֆուտբոլիստներ  Յուրա Մովսիսյանի, Հենրիխ Մխիթարյանի մարզաշապիկները, Արսեն և Լևոն Ջուլֆալակյանների մարզակոշիկները, Տիգրան Համասյանի վերնաշապիկը և այլն: Կան նաև Ռուդ Վան Նիստելռոյի և Ջերարդո Գատուզոյի ստորագրություններով վերնաշապիկները, ինչպես նաև՝ Տիգրան Համասյանի ու Հայաստանի ֆուտբոլի հավաքականի նախկին մարզիչ Վարդան Մինասյանի վերնաշապիկները:

Ակցիայի կազմակերպիչները, ըստ Արեն Մկրտչյանի, նշեցին, որ պատկերացում չունեն լոտերի մեկնարկային գների մասին և խնդրեցին այն կազմակերպությունների օգնությունն ու աջակցությունը, ովքեր բարեգործական ակցիաներ անցկացնելու փորձ ունեն: