Քեմերոնը հայտարարել է, որ հրաժարական չի տա, եթե Բրիտանիան դուրս գա ԵՄ-ից

Մեծ Բրիտանիայի վարչապետ Դևիդ Քեմերոնը հայտարարել է, որ հրաժարական չի տա, եթե բրիտանացիները հանրաքվեին ԵՄ-ից երկրի դուրս գալու օգտին քվեարկեն, հաղորդում է РИА Новости-ն:

Խորհրդարանականներից մեկի պահանջին՝ ասել, թե արդյոք նա իր պաշտոնից հրաժարական կտա ԵՄ-ից Բրիտանիայի դուրս գալու դեպքում, Քեմերոնը պատասխանել է մեկ բառով՝ «Ո՛չ»:

ԵՄ-ին Մեծ Բրիտանիայի անդամակցության շուրջ հանրաքվեն կկայանա հունիսի 23-ին: Հանրաքվեի հարցը, որը երկրում արդեն անվանում են ողջ սերնդի կարևորագույն ռազմավարական որոշում, հնչում է այսպես. «Պե՞տք է Միացյալ Թագավորությունը մնա Եվրոպական միության կազմում, թե՞ պետք է դուրս գա ԵՄ-ի կազմից»։

Քեմերոնը ԵՄ-ում Մեծ Բրիտանիային հատուկ կարգավիճակ տրամադրելու մասին պայմանավորվածության հասնելուց հետո հայտարարել է, որ բրիտանացիներին կքարոզի Եվրամիության կազմում երկրի մնալու օգտին։