Եղանակն՝ այսօր
Միջազգային լարվածության օջախներին մոտ լինելու հետևանքով Հայաստանը ՀԱՊԿ-ում զբաղեցնում է հատուկ տեղ. Սերգեյ Նարիշկին
Երևանում մեկնարկել է Հավաքական անվտանգության պայմանագրի կազմակերպության (ՀԱՊԿ) արտագնա նիստը, որը վարում է ՌԴ ԴԺ Պետական դումայի նախագահ, ՀԱՊԿ ԽՎ-ի խորհրդի նախագահ Սերգեյ Նարիշկինը:
«Սա շարունակությունն է ձևավորված այն բարի ավանդույթի, որ մենք անցկացնում ենք մեր նիստերը պետություններում, որոնք նախագահում են ՀԱՊԿ-ը: Նմանատիպ հանդիպումներ մենք անցկացրել ենք Մինսկում, Բիշքեկում, Մոսկվայում, և ահա երկրորդ անգամ հանդիպում ենք Հայաստանի հյուրընկալ մայրաքաղաքում՝ Երևանում»,- ասաց նա՝ շնորհակալություն հայտնելով ՀՀ ղեկավարությանը ջերմ ընդունելության համար, ՀՀ արտաքին գործերի և պաշտպանության նախարարություններին՝ նստաշրջանի կազմակերպման համար:
Սերգեյ Նարիշկինի խոսքով՝ ՀԱՊԿ խորհրդարանական Վեհաժողովը որպես միջխորհրդարանական կառույց, միշտ ձգտում է օրենսդրական դաշտում նպաստել մեր պետությունների անվտանգության ամրապնդմանը՝ ժամանակակից և բավական ոչ հեշտ պայմաններում:
«Այսօր կարևորագույն հարց է միջազգային տեռորիզմի դեմ պայքարը, ինչը հատուկ ընդգծվեց մեր պետությունների նախագահների կողմից՝ վերջին գագաթաժողովի ժամանակ: Այսօր մեր հանդիպման օրակարգում ևս այս հարցը կենտրոնական կլինի»,- հավելեց ՌԴ պետական դումայի նախագահը:
Խոսելով ՀԱՊԿ-ի առջև ծառացած ներկայիս մարտահրավերներից, Նարիշկինը նշեց. «Դուք լավ գիտեք, որ փետրվարի 22-ին ընդունվեց Ռուսաստան Դաշնության և ԱՄՆ միջև համատեղ հայտարարություն՝ Սիրիայում ռազմական գործողությունները դադարեցնելու մասին: Այս փաստաթղթի նպատակն այն է, որ տրվի ազդակ՝ լուծելու սիրիական հակամարտությունը, այն էլ՝ քաղաքական միջոցներով: Այսօր հիմնականում պահպանվում է հրադադարը, ընթացքը տանում է նրան, որ միջազգային ջանքերը համատեղվեն այս բարբարոսական կազմավորումների դեմ, որոնք ունեն Իսլամական պետություն անունը և այլ ահաբեկչական խմբավորումների դեմ»:
Սերգեյ Նարիշկինը նաև շեշտեց, որ այս ճանապարհին պետք է հաղթահարել ոչ պակաս կարևոր խոչընդոտներ: Ըստ նրա՝ իրենց համար ոչ պակաս մտահոգիչ է սիրիական տարածքը Թուրքիայի կողմից կրակահերթի տակ պահելն ու Թուրքիայի կողմից այլ գործողություններ նախաձեռնելը, որոնք ապակայունացնում են առանց այն էլ պայթյունավտանգ տարածաշրջանը:
«Հայաստանը իր աշխարհագրական դիրքի և միջազգային լարվածության օջախներին մոտ լինելու արդյունքում զբաղեցնում է հատուկ տեղ Կազմակերպությունում, ուստի մենք պետք է հաշվի առնենք ՀՀ փորձը, այդ թվում՝ խորհրդարանական փորձը, անվտանգության ապահովման հարցում: Այս առումով կա գործողությունների հստակ փաթեթ, որոնք կնպաստեն մեր կազմակերպության ուժային բաղադրիչի ամրապնդմանը»,- ընդգծեց Սերգեյ Նարիշկինը՝ հայտնելով, որ վաղն իրենք այցելելու են Երևանի «Էրեբունի» օդանավակայան և այս օրինակով ծանոթանալու Կովկասում մեր պաշտպանական հնարավորություններին:
Վերջում Սերգեյ Նարիշկինն ասաց նաև, որ ժամանակակից մարտահրավերին դիմակայելու համար ՀԱՊԿ-ը լայն հնարավորություն է տեսնում այլ միջազգային կառույցների հետ համագործակցության համար, իսկ մասնավորապես՝ եվրասիական համագործակցության:
Studio One